Share Market Opening Latest Update 3 April 2024 (Marathi News):
शेअर बाजार बुधवारी घसरणीसह उघडला. सेन्सेक्स आणि निफ्टी घसरणीसह व्यवहार करत आहेत. कमकुवत जागतिक संकेतांचा बाजारावर परिणाम झाला आहे. यात तैवानमधील भूकंप, रोखे उत्पन्नात झालेली वाढ आणि इतर घटकांचा समावेश आहे.
याशिवाय आजपासून सुरू होणाऱ्या आरबीआय एमपीसी धोरणाकडेही बाजाराची नजर आहे. सेन्सेक्स सुमारे 300 अंकांनी घसरून 73,600 वर तर निफ्टी जवळपास 100 अंकांनी घसरून 22,400 च्या खाली आला आहे. एमसीएक्सवर सोन्याचा भाव विक्रमी उच्चांकावर आहे. 10 ग्रॅम सोन्याचा भाव 70,000 रुपयांच्या जवळ पोहोचला आहे.
शेअर बाजाराच्या सुरुवातीच्या व्यवहारात निफ्टी मिडकॅप 100, निफ्टी आयटी, निफ्टी बँक, निफ्टी ऑटो, निफ्टी फार्मा, निफ्टी एफएमसीजी आणि निफ्टी फायनान्शियल सर्व्हिसेस निर्देशांक घसरणीसह व्यवहार करत होते, तर बीएसई स्मॉल कॅप निर्देशांकात किंचित वाढ होत होती.
BSE सेन्सेक्सच्या 30 शेअर्सपैकी 17 शेअर्समध्ये घसरण आणि 13 शेअर्स वाढीसह व्यवहार करत आहेत. सेन्सेक्सच्या वाढत्या शेअर्समध्ये टेक महिंद्रा 1.48 टक्के आणि अल्ट्राटेक सिमेंट 1.39 टक्क्यांनी वर आहे. ॲक्सिस बँक 1.10 टक्के आणि टाटा स्टील 0.52 टक्क्यांनी वर आहे. बजाज फायनान्स 0.31 टक्क्यांच्या वाढीसह आणि एचसीएल टेक 0.18 टक्क्यांच्या वाढीसह व्यवहार करत आहे.
निफ्टीच्या 50 शेअर्सपैकी फक्त 12 शेअर्समध्ये वाढ आणि 38 शेअर्स घसरणीसह व्यवहार करत आहेत. निफ्टीच्या टॉप गेनर्सपैकी हिंदाल्को 1.79 टक्क्यांनी आणि श्री राम फायनान्स 1.54 टक्क्यांनी वर आहे. अल्ट्राटेक सिमेंट 1.33 टक्के आणि ओएनजीसी 1.10 टक्क्यांनी वर आहे. ॲक्सिस बँक एक टक्का वाढीसह व्यवहार करत आहे.
बुधवारी सुरुवातीच्या व्यवहारात, अदानी समूहाच्या 10 पैकी तीन कंपन्यांच्या शेअर्समध्ये वाढ झाली. अदानी पॉवर सुमारे चार टक्क्यांच्या वाढीसह व्यवहार करत होता, तर एसीसी लिमिटेड एक टक्क्यांच्या घसरणीसह व्यवहार करत होता.
अमेरिकन शेअर बाजारातील विक्रीमुळे आशियाई शेअर बाजारातही विक्री वाढल्याचे शेअर बाजारातील तज्ज्ञांचे म्हणणे आहे. अमेरिकेतील ट्रेझरी बॉण्डचे उत्पन्न वाढल्यामुळे परदेशी गुंतवणूकदार भारतासारख्या बाजारपेठेत गुंतवणूक करण्याचे टाळत आहेत.
अमेरिकेतील ट्रेझरी उत्पन्न गेल्या वर्षी डिसेंबरपासून 4.4 टक्क्यांच्या सर्वोच्च पातळीवर पोहोचले आहे. कच्च्या तेलाच्या किमतीने 5 महिन्यांतील उच्चांक गाठल्याने शेअर बाजारातील चिंताही वाढली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.