ढिंग टांग : महागाईचे अभंग!

बरे केले देवा । केलो चाकरमानी।

जैसे सुणें इमानी। दारापाशी।।

भाकरी पुढ्यात । पडे कोरभर।

तेवढे पोटभर । पुरे झाले ।।

भावभिने सुणें। हालवी शेपूट ।

प्रेमाची लयलूट । पोटासाठी ।।

सौंसार आमुचा । किडुक मिडुक ।

त्यात परंसुख । शोधतो गा।।

अल्प अल्प जीव । अल्पसा संतोष।

कुणावरी रोष । नाही नाही ।।

झोडिते अस्मान । हाणितो सुल्तान ।

तरी गा गुमान । आम्ही सारे ।।

कोणीही गा यावे ।

टिचकी मारोनिया जावे ।

आम्ही जीवेभावे । वांकू तेव्हा ।।

विषाणूंने केले। आम्हासी बेजार ।

केवढा बाजार। औषधांचा ।।

मृत्यूच्या छायेत । आमुचा वावर ।

तगादा तक्रार । काही नाही ।।

ऐसी साडेसाती। बिघडे कुंडली।

ग्रहांची धांदली । अमंगळ ।।

तरीही कधीही । नाही उमटली ।

विव्हळ किंकाळी । हूं की चूंही।।

देवा तुवा का रे । ऐकू न ये साद ।

जाहलो मोताद । उ:शापाला ।।

घरां ये वरवंटा । हाताशी करवंटी ।

वाजली ना घंटी । नशिबाची ।।

महागाई ऐसी। कर्कशा चेटकी ।

हांसते लटकी । खाय खाय ।।

काय फिरविसी। आम्हा जगदीशा।

साऱ्या दाहीदिशा । अन्नासाठी ।।

महागाई झाली। केवढी चढेल ।

आमुचे पडेल । चेहरे तैसे ।।

खिशामाजी नाही । पैसा नि अडका ।

रोजच्या धडका । भिंतीवरी ।।

काय मारु आता । दातांवरी देवा ।

पोटात वणवा । भुकेचा गा ।।

कशीबशी आम्ही । करितो गुजराण ।

तरी धूळधाण । आयुष्याची ।।

आमुची गा आहे। दुनिया दीडवीत ।

हीच जगीं रीत । आहे ना रे? ।।

नवल की वाटे । तुझे विश्वंभरा ।

आहेस तू खरा । आहेस ना? ।।

असशील कोठे । तूच माझा हरी ।

देशी खाटेवरी। ऐसे कानी ।।

तुझे मौन देवा । आहे भयंकर ।

तुजविण चराचर । उफराटे ।।

जगणे महाग । नित्य ओढघस्त ।

मरण हे स्वस्त । ऐसे झाले ।।