मनमोराचा पिसारा : कोंडी पुरुषांची!

-अनोनी कवडुजी मानापुरे

आजची स्त्री आपली पूर्ण ताकद लाऊन अनेक मोहिमा फत्ते करून देशाचं नाव जगात रोशन करत आहे. मात्र अनेक स्त्रिया रोज काहीतरी चुकीचं करून स्त्रियांचा आदर कमी करत आहेत. यात शिक्षणाचा काही दोष नाही. परंतु समाजात असा गैरसमज झाला आहे की शिकलेल्या मुली घर टिकवून ठेवत नाहीत. कळत नकळत पुरुषांनाही याचा फटका बसत आहे.

पुरुषांच्या खांद्याला खांदा लावून आजची स्त्री यशाचं नवनवीन शिखर गाठत आहे. स्वत:ची वेगळी अशी ओळख बनवत आहे. स्वतःचा स्वाभिमान जपून एक नवं आयुष्य जगण्याचा प्रयत्न ती करतं आहे. पण यामध्ये पुरुष काही प्रमाणात भरडले जात आहेत याकडे क्वचितच लक्ष दिलं जात आहे. संसाररूपी जीवनाची दोन चाके म्हणजे स्त्री व पुरुष. आई, पत्नी, मुलगी असं आयुष्य तो या तिघींभोवती गुंफत असतो. यात अनेक पुरुषांची आई आणि बायको यामध्ये कोंडी होत असताना दिसते.

एक त्याची जन्मदात्री तर दुसरी त्याची अर्धांगिनी. दोघीही त्याच्यासाठी तेवढ्याच महत्त्वाच्या. आज आईवडील आपल्या मुलींना उच्च शिक्षण देत आहेत. अन्यायाविरुद्ध उभं रहायला पण शिकवत आहेत. पण उणीव फक्त एका प्राथमिक शिक्षणाची भासत आहे ती म्हणजे की प्रत्येक मुलं हे आपल्या आईवडिलांच्या काळजाचा तुकडा असते. एका मुलाला त्याच्या आईवडिलांपासून दूर करणं हा सुद्धा एक अन्याय आहे हे कोणाच्याच कसं लक्षात येत नाही.

आज भरपूर कायदे हे महिलांच्या बाजूने आहेत. पण त्याचा योग्य उपयोग न होता स्वार्थीपणामुळे दुसऱ्यांच्या जिवाशी खेळ सुरु असलेला दिसतो. आपला नवरासुद्धा कोणाच्या तरी काळजाचा तुकडा आहे हे विसरू नका आणि आपल्या सासुसासऱ्याची स्वत:च्या आईवडिलांप्रमाणे काळजी घ्या. येणारी पिढीही त्यातूनच शिकणार आहे, तोच मार्ग अवलंबणार आहे. पुरुषांच्या मनाचा त्याच्या विचारांचा आदर करणे ही काळाची गरज आहे.