मोदी -०३ मध्ये विरोधकांना बळ

पंतप्रधान नरेंद्र मोदी यांच्या नेतृत्वाखालील राष्ट्रीय लोकशाही आघाडीचे सरकार विविध निर्णय घेत काम करत असून ‘मोदी-३’ मध्ये सध्या तरी विरोधकांना सर्वोच्च न्यायालयाचे काही निर्णय झाल्यामुळे बळ आल्याचे दिसत आहे. हरियाणा आणि दिल्ली ही सध्या विरोधकांच्या दृष्टीने काम करून दाखविण्याची ठिकाणे आहेत..सर्वोच्च न्यायालयाच्या काही निर्णयामुळे विरोधकांना बळ प्राप्त झाले आहे. ईडी आणि सीबीआय या दोन संस्थांच्या कारवाईमुळे जे नेते गेल्या काही दिवसांत तुरुंगात गेले होते, त्यापैकी दिल्लीचे माजी उपमुख्यमंत्री मनीष सिसोदिया आणि भारत राष्ट्र समितीच्या के. कविता यांची तुरुंगातून सुटका झाली.सिसोदिया तर अनेक महिन्यांच्या तुरुगंवासानंतर बाहेर आले. सिसोदिया १७ महिन्यांनंतर तर के. कविता ५ महिन्यांनंतर तुरुंगातून बाहेर आल्या. सुटकेनंतर कविता बऱ्याच भावूक झाल्या होत्या. सिसोदिया यांनी तुरुंगातून सुटल्यानंतर तातडीने दिल्लीमध्ये पदयात्रा सुरू केली आहे..यातील एका पदयात्रेची मी स्वतः साक्षीदार आहे. अत्यंत उत्साहाने सिसोदिया पदयात्रा करत असून केजरीवाल यांच्या अनुपस्थितीत मतदारांना निराशा जाणवणार नाही, त्यांच्यात उत्साह येईल अशा पद्धतीने ते फिरत आहेत.न्यायालयाच्या निर्णयामुळे विरोधकांना एकप्रकारे ऑक्सिजनच मिळाला आहे.न्यायालयाने या नेत्यांना जामीन देताना जामीन हाच नियम असावा आणि तुरुंग हा अपवाद आहे, असे स्पष्ट शब्दांत खालच्या कोर्टाला बजावले आहे. के. कविता यांना जामीन मिळाल्यानंतर आंध्र प्रदेशचे मुख्यमंत्री रेवंत रेड्डी यांनी भारतीय जनता पक्ष आणि भारत राष्ट्र समिती यांच्यात करार झाला असून या करारापोटी के. कविता यांना जामीन मिळाला, असा आरोप केला होता..रेवंत रेड्डी यांच्या शेरेबाजीमुळे सर्वोच्च न्यायालयाचे न्यायमूर्ती संतप्त झाले. त्यांनी आम्ही राजकीय पक्षांशी सल्लामसलत करून निर्णय देतो का? असा प्रश्न विचारून रेवंत रेड्डी यांना फटकारले. न्या. भूषण गवई यांच्या खंडपीठाने रेवंत रेड्डी यांना खडे बोल सुनावून आपला ठाम पवित्रा दाखवून दिला आहे.झारखंडमधील नेते प्रेमप्रकाश यांच्या जामीन प्रकरणातील न्यायालयाने ठोस भूमिका घेऊन, तुरुंग हा अपवाद आहे. लोकांच्या मूलभूत अधिकाराचं उल्लंघन होता कामा नये, असं स्पष्ट शब्दांत सुनावून त्यांना जामीन दिला. कोणत्याही व्यक्तीचं वैयक्तिक आयुष्य किंवा स्वातंत्र्य हिरावून घेतलं जाता कामा नये याची कायद्यात काळजी घेण्यात आली आहे. याची बूज राखली जावी, असं न्यायालयाने स्पष्ट शब्दांत सांगितलं आहे..अंमलबजावणी संचालनालय आणि केंद्रीय तपास यंत्रणा अर्थात ईडी आणि सीबीआय यांच्या रडारवर सध्या हरियाणातील काँग्रेसचे ज्येष्ठ नेते व हरियाणाचे माजी मुख्यमंत्री भूपेंद्रसिंह हुडा आहेत. भूपेंद्रसिंह यांच्याभोवती ईडी आणि सीबीआयने आपले जाळे विणलेले आहे. त्यांची चौकशी देखील सुरू आहे. हुडा यांच्यावर ज्या प्रकरणांचा आरोप आहे, त्यामध्ये ईडीने ८३४ कोटी रुपयांची ४०२ एकर जमीन जप्त केली आहे.अंमलबजावणी संचालनालयाच्या हालचालीमुळे हुडा अडचणी आले असले, तरी हरियानात काँग्रेसकडून सध्या सक्रिय असलेले प्रभावशाली नेते हेच आहेत यात शंका नाही. हरियाणामध्ये काँग्रेसला येत्या विधानसभा निवडणुकीत सत्तेवर येण्याचा विश्वास आहे. हुडांवरती काँग्रेसचे प्रचंड भिस्त आहे..हुडा यांनी काँग्रेस श्रेष्ठींचा विश्वास नुकत्याच झालेला लोकसभा निवडणुकीत सार्थ ठरवला आहे. लोकसभा निवडणुकीत त्यांनी काँग्रेसला १० पैकी ५ जागा मिळवून दिल्या. आत्ताही राज्यभर अत्यंत उत्साहाने फिरत आहेत. हरियाणानंतर विरोधी आघाडीतील आम आदमी पक्षाचे नेते मनीष सिसोदिया वेगाने निवडणूक प्रचारात उतरले आहे.खरे तर दिल्लीची विधानसभा निवडणूक अद्याप लांब आहे. ठरलेल्या कार्यक्रमानुसार जर ही निवडणूक झाली, तर दिल्लीतल्या निवडणुका फेब्रुवारीत होतील पण आम आदमी पक्षाला अशी भीती वाटत आहे, की येत्या नोव्हेंबरमध्ये महाराष्ट्र आणि झारखंड या दोन राज्यांबरोबरच नवी दिल्लीच्या विधानसभा निवडणुका घेतल्या जातील. आम आदमी पक्षाचे नेते मनीष सिसोदिया तुरुंगातून बाहेर आले असले आणि त्यांना संजयसिंह या दुसऱ्या नेत्यांची साथ असली, तरी त्याला मर्यादा आहेत. संजयसिंह काही दिवस तुरुंगात होते..आम आदमी पक्षाचे आणखी एक नेते सत्येंद्र जैन आणि त्यांचे मुख्य नेते व मुख्यमंत्री अरविंद केजरीवाल अद्यापि तुरुंगातच आहे. सिसोदिया प्रचंड उत्साहात दिल्लीमध्ये विविध भागात पदयात्रा करत आहेत. त्यांच्या पदयात्रा सुरू असताना कार्यकर्ते मोठ्या उत्साहाने ज्या घोषणा देतात त्यातील एकच घोषणा खूपच महत्त्वाची आहे. ‘सिसोदिया आ गये, केजरीवाल भी आयेंगे.’दिल्लीमधील मध्यमवर्गीय मतदारांवरील आम आदमी पक्षाचे गारुड थोडे फार उतरले असले, तरी तळागाळातील मतदारांमध्ये ‘आप’चे गारुड कायम आहे. अनेक लोक आम आदमी पक्षाच्या नेत्यांबद्दल चांगले बोलत आहेत. ही मंडळी आमच्यासाठी काम करत आहेत. यांच्यामुळे आम्हाला पाणी मिळाले, चांगल्या शाळा मिळाल्या, दवाखान्यांमध्ये औषधे मिळाली, आम्हाला कधीही वाटले नव्हते ते मोफत बसप्रवासाचे काम यांच्यामुळे शक्य झाले..आमच्यासाठी अनेक चांगल्या गोष्टी ही मंडळी करीत आहेत मात्र त्यांना आमच्यासाठी चांगले काम करण्यापासून रोखले जात आहेत, असे या लोकांना वाटते. गरीब वर्गामध्ये आपचे अनेक नेते आजही हीरो म्हणून टिकून आहेत. तुरुंगातून बाहेर आल्यानंतर सिसोदिया यांनी पक्षाच्या संघटना बांधणीवर आपले सारे लक्ष केंद्रित केले आहे.पक्षाचे जे पाच नगरसेवक सोडून गेले होते त्यातील एका नगरसेवकाला अर्थात रामचंदर यांना त्यांनी पुन्हा पक्षात घेतले आहे. दिल्ली महापालिकेच्या प्रभाग समित्यांच्या निवडणुका जाहीर झाल्या असून त्याला खूप महत्त्व आहे. पाच कोटींपेक्षा जास्त खर्चाच्या कामांना मंजुरी देणाऱ्या या समित्यांना महत्त्व आहे. त्या दृष्टीने आप सर्व दृष्टीने मोर्चेबांधणी करीत आहेत..महापालिकेतील सत्तेचा तसेच विधानसभेतील सत्तेचा वापर करून आप दिल्लीमध्ये आपले पाय भक्कम करण्याचा प्रयत्न करत आहे. लोकसभा निवडणुकीमध्ये आपची काँग्रेसबरोबर युती होती मात्र विधानसभा निवडणुकीत आपची काँग्रेसबरोबर कसल्याच प्रकारची युती नसेल, याची जाणीव आपच्या सर्वच नेत्यांना व कार्यकर्त्यांना आहे. त्या दृष्टीने ते निवडणुकांची तयारी करत आहेत..भाजपच्या दृष्टीने आगामी वाटचालीसाठी हरियाणा ही पहिली परीक्षा असेल. जम्मू-काश्मीरमध्ये काय होते याबद्दल भाजप फारसा विचार करताना दिसत नाही. मात्र हरियाणानंतर भाजपची खरी परीक्षा दिल्ली, झारखंड आणि महाराष्ट्र असेल. त्यासाठी विरोधक सज्ज आहे आणि सर्वोच्च न्यायालयाचे ताजे निर्णय त्यांना खऱ्या अर्थाने प्राणवायूचा पुरवठा करणारे ठरले आहे.(लेखिका ह्या दिल्लीस्थित ज्येष्ठ पत्रकार असून राजाकीय घडामोडींचे विश्लेषण करतात.)(अनुवाद : एन. के. खांबेटे).ब्रेक घ्या, डोकं चालवा, कोडे सोडवा!Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

मोदी -०३ मध्ये विरोधकांना बळ

Related Stories