New Year 2024 : नववर्षाच्या स्‍वागतासाठी शिवारातील मेजवानीला पसंती; गावरान कोंबड्यांच्‍या मागणीत मोठी वाढ

कोपर्डे हवेली : ग्रामीण भागात शेतीबरोबर जोडधंदा म्हणून कुक्कुटपालन व्यवसायाकडे पाहिले जाते. त्यामुळे ग्रामीण भागात घरोघरी अर्थार्जनासाठी गावरान (देशी) कोंबड्या पाळल्या जातात. नववर्षाच्या (New Year 2024) स्वागतासाठी खवय्यांची जय्यत तयारी सुरू झाली असून, ठिकठिकाणी मेजवाणीचे बेत आखले जात आहेत.

या नियोजनासाठी गावरान कोंबड्यांना (Chickens) पसंती दिली जात असून, त्‍याची मागणी मोठ्या प्रमाणावर वाढल्याचे दिसून येत आहे. शहरी भागातील नागरिक नववर्षाच्या स्वागतासाठी हॉटेलला पसंती देतात, तर ग्रामीण भागात शेतवस्ती किंवा शिवारात पार्टी करण्यावर भर दिला जातो.

सध्या गावरान (देशी) कोंबड्यांना मागणी वाढल्यामुळे दर वधारले आहेत. सर्वसाधारणपणे गावरान कोंबडा सातशे रुपये, तर कोंबडी पाचशे रुपयेप्रमाणे विक्री केली जात आहे. याच गोष्टीचा व्यापारी फायदा उचलत असून, देशी कोंबड्यांच्या नावाखाली संकरित जातीच्या कोंबड्यांची विक्री करून ग्राहकांची फसवणूक करत आहेत. संकरित आणि देशी कोंबड्यांच्या चवीत फरक असल्यामुळे खवय्यांची पहिली पसंती ग्रामीण भागातील देशी कोंबड्यांनाच आहे.

गावरान कोंबड्यांच्या नावाखाली व्यापाऱ्यांकडून संकरित जातीच्या कोंबड्यांची विक्री होत आहे. त्यामुळे आम्ही घरगुती कुक्कुटपालन करणाऱ्या शेतकऱ्यांकडून कोंबडे खरेदी करतो. चवीबाबतीत इतर मांस, बॉयलर, संकरितच्या तुलनेत गावरान सरस आहे. त्‍यामुळे मेजवानीचा बेत आखला, की आम्ही पहिली पसंती गावरानलाच देतो.

-अजित चव्हाण, गावरान चिकनप्रेमी, कोपर्डे हवेली.

वाण एकसारखा चवीत मात्र फरक

गावरान कोंबडी आणि संकरित जातीच्या कोंबड्यांचा सर्वसाधारणपणे वाण एकसारखा असला, तरी चवीत फरक आहे. त्‍यामुळे जातिवंत देशी कोंबड्यांनाच ग्राहकांची पसंती दिसून येत आहे. अशा कोंबड्या खरेदी करताना त्‍या शेतकऱ्यांकडूनच घेण्यावर जास्त भर असतो.