चाफळ विभागात ९० टक्के पेरण्या

चाफळ - विभागात गत आठवड्यात झालेल्या समाधानकारक पावसामुळे ९० टक्के खरिपाच्या पेरण्या पूर्ण झाल्या आहेत. डोंगरी भागात पिकांची उगवण चांगली झाल्याने विभागातील शेतकरी समाधान व्यक्त करत आहेत.

बळीराजा कोळपणीच्या कामात व्यस्त आहे. यावर्षी विभागात वळीव पाऊस चांगला झाल्याने पेरणीपूर्व मशागतीची कामे वेळेत पूर्ण झाली. तरीही तळभागातील शेतकरी मोठ्या पावसाच्या प्रतीक्षेत होता. त्यामुळे तळभागातील पेरण्याही रखडल्या होत्या. मागील आठवड्यात समाधानकारक पाऊस झाल्याने बळीराजाने पेरणी करण्यास सुरुवात केली. आजपर्यंत विभागात ९० टक्के पेरण्या पूर्ण झाल्या आहेत.

डोंगरी भागात हायब्रीड, पसऱ्या भूईमुग, निमपसऱ्या, वेस्टर्न, ट्रॉंबे आदी भुईमुगाच्या जाती, भात या मुख्य पिकाबरोबरच विविध प्रकारची कडधान्याची पेरणी करण्यात आली आहे. या सर्वच पिकांची उगवण चांगल्या प्रकारे झाल्याने येथील शेतकरी समाधानी आहेत. चाफळसह इतर तळभागात सोयाबीन पेरण्याचे प्रमाण जास्त आहे.

विभागात गणेवाडी, कोळेकरवाडी, भैरेवाडी, महाबळवाडी, गुजरवाडी, सर्व सडे, कोचरेवाडी, विरेवाडी, चव्हाणवाडी, मस्करवाडी व जंगलवाडीतील काही शेतकरी दुर्मिळ होत चाललेली नाचणी व वरीचे पिकही घेत आहेत. नाचणीच्या तरव्याचींही उगवण चांगली झाली आहे. पाडळोशी, धायटी व दाढोली परिसरात लागणीचे भात मोठ्या प्रमाणात घेतले जाते. येथेही भाताचे तरवे चांगल्या प्रकारे उगवून आले आहेत.