वेण्णा नदीपात्रातील बांधकामावर महाबळेश्वर पालिकेचा 'हातोडा'

महाबळेश्वर (सातारा) : येथे वेण्णा नदीपात्रात (Venna River) अतिक्रमण करून बेकायदेशीर बांधकाम करीत असलेल्या एका धनिकास पालिकेच्या मुख्याधिकारी पल्लवी पाटील (Chief Officer Pallavi Patil) यांनी दणका दिला आहे. पालिकेच्या (Mahabaleshwar Municipality) बांधकाम विभागाने (Construction Department) इमारतीमध्ये असलेले बांधकाम साहित्य व औजारे जप्त करून बेकायदेशीर बांधकाम न करण्याची सक्त ताकीद दिली आहे. मुख्याधिकाऱ्यांच्या या भूमिकेमुळे वेण्णा नदी पात्रात विनापरवाना बांधकाम करणाऱ्यांचे धाबे दणाणले आहेत.

वेण्णालेक जवळच एका धनिकाने नदीपात्रात अतिक्रमण करून विनापरवाना बांधकाम सुरू केले आहे. पालिकेने वेळोवेळी विनापरवाना बांधकाम करीत असलेल्या मिळकतधारकास नोटिसा बजावल्या आहेत; परंतु पालिकेच्या नोटिसांना केराची टोपली देऊन राजकीय वरदहस्ताच्या आधारे या धनिकाने एक एक मजला करीत इमारतीचे बांधकाम सुरू ठेवले आहे. नोटिसाला हा धनिक किंमत देत नाही हे पाहून पालिकेने या मिळकतधारकावर दोन वेळा गुन्हे दाखल केले आहेत. पालिकेचा अडथळा नको, म्हणून या मिळकत धारकाने पालिकेविरोधात न्यायालयात धाव घेऊन स्थगिती आदेश मिळविला आहे.

दरम्यान, पुन्हा या इमारतीवर चौथ्या मजल्याचे बांधकाम मिळकतधारकाने सुरू केले आहे. स्थगिती आदेश असताना या मिळकतधारकाने पुन्हा इमारत बांधकाम सुरू केल्याने पालिकेच्या मुख्याधिकारी यांनी या मिळकतधारकावर कारवाई करण्याचा निर्णय घेतला. त्यांनी बांधकाम विभागातील कर्मचारी संबंधित इमारतीवर पाठविले. त्या ठिकाणी काम सुरू असल्याचे निदर्शनास आल्याने त्या ठिकाणी असलेले सर्व बांधकाम साहित्य व औजारे पालिकेच्या पथकाने जप्त करून आणले आहे. त्याचप्रमाणे बांधकाम करू नये, अशी सक्त ताकीद दिली आहे. या भागातील नदीपात्रातील अतिक्रमणांवर पालिका सरसकट कारवाई करणार का? असा प्रश्न नागरिक उपस्थित करीत आहेत.