तसं झालं तर ठिक, अन्यथा राष्ट्रवादीविरोधात उदयनराजे निवडणूक लढवणार

सातारा : जिल्हा बॅंकेच्या निवडणुकीत (Satara Bank Election) सर्वसमावेशक पॅनेलमध्ये खासदार उदयनराजे भोसले (MP Udayanraje Bhosale) यांना सामावून घेण्याबाबत अद्यापपर्यंत तरी निर्णय झालेला नाही. त्यामुळे खासदार उदयनराजे भोसले यांनी घेतले तर ठिक अन्यथा निवडणूक लढण्याची तयारी केली आहे. त्यामुळे आज (रविवारी) होणाऱ्या राष्ट्रवादीच्या प्रमुख नेत्यांच्या बैठकीकडे सर्वांचे लक्ष लागले आहे. बैठकीत कोणाकोणाला अर्ज मागे घेण्यास सांगितले जाणार आणि जागा वाटपाचा तिढा कसा सोडविणार यावर निवडणुकीचे भवितव्य अवलंबून आहे.

जिल्हा बॅंकेच्या निवडणुकीसाठी अर्ज मागे घेण्यास तीन दिवस बाकी आहेत, तर राष्ट्रवादीच्या नेत्यांचे जागा वाटप अद्याप पूर्ण झालेले नाही, तसेच कोणा कोणाला अर्ज मागे घेण्यास सांगायचे हेही निश्चित झालेले नाही. त्यामुळे सर्वांचे लक्ष आज (रविवारी) होणाऱ्या राष्ट्रवादीच्या प्रमुख नेत्यांच्या बैठकीकडे लागले आहे. उदयनराजेंना सामावून घेण्याबाबतचा चेंडू अखेरच्या क्षणापर्यंत शिवेंद्रसिंहराजे भोसले यांच्यावर सोपवून राष्ट्रवादीचे नेते गंमत पाहात बसले आहेत. खासदार उदयनराजे ज्या मतदारसंघातून निवडणूक लढत आहेत. तेथे सर्वाधिक मते सातारा, कऱ्हाड व फलटण तालुक्यांत आहेत. येथील मतांवर प्रामुख्याने सभापती रामराजे नाईक- निंबाळकर (Ramraje Naik- Nimbalkar), सहकारमंत्री बाळासाहेब पाटील (Balasaheb Patil), आमदार शिवेंद्रसिंहराजे भोसले (MLA Shivendrasinharaje Bhosale) यांचा प्रभाव असल्याचे सांगितले जात आहे. दुसऱ्या बाजूने या मतदारसंघातील ५५ मते उदयनराजेंकडे असल्याचे सांगितले जात आहे. त्यामुळे सर्वांनी मदत केली, तरच उदयनराजेंना निवडणूक सोपी जाणार आहे.

पालकमंत्री बाळासाहेब पाटील काल (शुक्रवारी) बारामतीस जाऊन राष्ट्रवादीचे अध्यक्ष खासदार शरद पवार यांना भेटून आलेले आहेत. या भेटीत त्यांना काही कानमंत्रही या निवडणुकीसाठी मिळालेला असणार आहे. मुळात उदयनराजेंच्या विरोधात राष्ट्रवादीने तीन ते चार उमेदवारांचे अर्ज भरलेले आहेत. त्यापैकी कोणाचा अर्ज ठेवायचा हे निश्चित झालेले नाही, तसेच उदयनराजेंशीही आमदार शिवेंद्रसिंहराजेंची चर्चा झालेली नाही. त्यामुळे सन्मानाने उदयनराजेंना सामावून घेतले तर ठिक अन्यथा निवडणूक लढायची, अशा तयारीत उदयनराजे व त्यांचे समर्थक सल्लागार आहेत. उदयनराजेंचा जिल्हा बॅंकेत संचालक असूनही कोणताही हस्तक्षेप नसतो. त्यामुळे अखेरच्या क्षणी त्यांना सामावून घेण्याचाही निर्णय होऊ शकतो. याबाबत सभापती रामराजे नार्इक- निंबाळकर, सहकारमंत्री बाळासाहेब पाटील, आमदार शिवेंद्रसिंहराजे हे तिघे उद्याच्या बैठकीत काय निर्णय घेणार यावर सर्व चित्र अवलंबून आहे.

विजयासाठी १३६ मतांची गरज

उदयनराजे ज्या मतदारसंघातून लढत आहेत. त्यामध्ये एकूण २७२ मतदार आहेत. यातील सर्वाधिक मतदार सातारा तालुक्यात ९८, कऱ्हाड ६६, फलटण १३, पाटण ४०, वाई १५ मते आहेत. उदयनराजेंना निवडून येण्यासाठी १३६ मते मिळाली तर ते निवडून येऊ शकतात.