आघाडीतच रंगणार झेडपीचं धुमशान; देसाई-पाटणकर गटांत होणार लढती

पाटण (सातारा) : जिल्हा बँक निवडणूकीपासून (District Bank Election) राजकीय शांतता असलेल्या पाटण तालुक्यात (Patan Taluka) आगामी जिल्हा परिषद, पंचायत समितीच्या निवडणुकीची (Panchayat Samiti Election) मशागत सुरू झाली आहे. आघाडी शासनाच्या शिवसेना आणि राष्ट्रवादी काँग्रेस या घटक पक्षांमध्येच जिल्हा परिषद, पंचायत समितीचा सामना रंगणार आहे. निवडणूक डोळ्यासमोर ठेवून गृहराज्यमंत्री शंभूराज देसाई (Shambhuraj Desai) यांनी विकासकामांचे उद्घाटन, भूमिपूजनाचा सपाटा लावला आहे. विरोधी सत्यजितसिंह पाटणकर धरणांची अपूर्ण कामे, अतिवृष्टीतील नुकसान भरपाईच्या निमित्ताने ॲक्शन मोडवर आले आहेत.

राज्य सरकारने ओबीसी आरक्षण (OBC Reservation) लटकल्याने जिल्हा परिषद, पंचायत समितीच्या निवडणुका पुढे ढकलल्या आहेत. पाटण पंचायत समितीच्या विद्यमान पदाधिकाऱ्यांचा कार्यकाल संपल्यानंतर शासनाने प्रशासकाच्या हाती कारभार दिला आहे. गटविकास अधिकारी मीना साळुंखे सध्या प्रशासक म्हणून कार्यभार सांभाळत आहेत. पावसाळ्यापूर्वी निवडणुका जाहीर झाल्या, तर प्रचाराला वेळ मिळणार नाही, हे लक्षात घेऊन दोन्ही नेते सक्रिय झाले आहेत. दोन महिने झाले गृहराज्यमंत्री देसाई यांनी विकासकामांचे उद्घाटन, भूमिपूजन कार्यक्रमांचा सपाटा लावला आहे. सायरन वाजवत गृहराज्यमंत्र्यांची लाल दिव्याची गाडी प्रत्येक विभागातील गावागावांत सुसाट धावत आहे. कार्यकर्ते मंत्री देसाईंच्या मिरवणुका काढून वातावरणनिर्मिती करत आहेत.

जिल्हा बँक व नगरपंचायत निवडणुकीनंतर पाटणकर यांनी आमदार शशिकांत शिंदे (Shashikant Shinde) यांना बरोबर घेऊन शिष्टमंडळासह धरणांच्या अपूर्ण कामासंदर्भात व अतिवृष्टी नुकसानभरपाई निधीच्या निमित्ताने मंत्रालयात उपमुख्यमंत्री अजित पवार (Ajit Pawar), जलसंपदामंत्री जयंत पाटील यांच्यासोबत बैठका घेऊन राष्ट्रवादी काँग्रेसची गाडी ॲक्शन मोडवर आणत आहेत, असे दिसत आहे. जिल्हा बँक व नगरपंचायत निवडणुकीत राजकीय आरोप-प्रत्यारोप टोकाचे झाले. काही काळ शांतता होती. मात्र, पुन्हा दोन्ही नेते सक्रिय झाल्याने राजकीय धुरळा उडणार आहे. आघाडीचा धर्म पाळत विरोधक आक्रमक नसले तरी गृहराज्यमंत्री देसाई यांनी सुसाट वेगाने चाललेल्या गाडीवर नियंत्रण न ठेवल्यास अपघाताला निमंत्रण दिल्यासारखे होणार आहे.