पुणे-सातारा महामार्गावरील खंबाटकी घाटात मोठी वाहतूक कोंडी; तीन किलोमीटरपर्यंत लागल्या रांगा

खंडाळा : आज (शनिवार) सकाळी दहा वाजल्यापासून पुणे-सातारा महामार्गावरील (Pune-Satara Highway) खंबाटकी घाटात (Khambatki Ghat) दोन ट्रक बंद पडल्याने, तसेच वाहनांची संख्या सर्वाधिक असल्याने सातारा बाजूकडे जाणारी वाहतूक ठप्प झालीये.

परिणामी, एक लेन घाटातील बोगदा मार्गे सोडण्यात आली आहे. आठवड्याच्या सुट्टीला लागूनच सोमवारी ख्रिसमसची सुट्टी असल्यामुळे अनेकजण गोवा व महाबळेश्वरकडे निघाले आहेत. यामुळं वाहनांची संख्या महामार्गावर सर्वाधिक आहे.

यातच घाट माथ्यावर दोन ट्रक सकाळी-सकाळीच बंद पडले, त्यामुळं घाटात हळूहळू कोंडी व्हायला लागली. दरम्यान, वाहनांच्या तीन किलोमीटर रांगा पारगाव-खंडाळा पर्यंत लागल्या. यावेळी घाट अधिक काळ जाम राहू नये, म्हणून ही वाहतूक सिंगल लेनने बोगदामार्गे वळविण्यात आली. सध्या ही वाहतूक सुरळीत करण्यासाठी वाहतूक सहाय्यक पोलीस निरीक्षक हर्षद गालिंदे, विजय जाधव व वाहतूक पोलीस प्रयत्न करत आहेत.