Ashadhi Wari : पालखी मार्गावरील वाहतूक व्यवस्थेत मोठा बदल; 'ही' वाहतूक पूर्णपणे बंद, पोलिस अधीक्षकांची माहिती

सातारा : संत श्री ज्ञानेश्‍वर महाराज पालखी (Dnyaneshwar Maharaj Palkhi) सोहळ्याच्या पार्श्वभूमीवर वाहतूक कोंडी टाळण्यासाठी व वारकऱ्यांना कोणत्याही प्रकारचा अडथळा येऊ नये, यासाठी १७ ते २३ जून या कालावधीत पोलिस अधीक्षक समीर शेख (Sameer Sheikh) यांनी वाहतुकीमध्ये बदल केले आहेत.

ज्ञानेश्‍वर महाराजांची पालखी १८ ते २३ जून यादरम्यान जिल्ह्यातून जात आहे. या पार्श्वभूमीवर पोलिस, रुग्णवाहिका आणि अग्निशमन दलाची वाहने वगळता इतर वाहनांसाठी वाहतुकीमध्ये बदल करण्यात आले आहेत. शनिवार (ता. १७) ते बुधवारी (ता. २१) या दरम्यान फलटण-लोणंद मार्गावरील वाहतूक पूर्णपणे बंद केली आहे.

शनिवारी सकाळी ६ पासून बुधवारी मध्यरात्रीपर्यंत फलटणमधून नीराकडे जाणारी वाहने बारामती किंवा वाठार स्टेशन येथून पुण्याकडे शिरगाव घाटाने जातील. शनिवारपासून २० जूनपर्यंत आदर्की फाटा येथून लोणंदकडे जाणारी वाहतूक पालखी सोहळ्यातील वाहनाखेरीज इतरांना बंद करण्यात येईल. शनिवारपासून २२ जूनच्या दुपारी एकपर्यंत लोणंदमधून फलटणकडे जाणारी वाहतूक आदर्कीमार्गे वळविण्यात येतील.

२१ ते २३ जूनच्या सायंकाळी चारपर्यंत फलटण ते नातेपुते जाणारी वाहतूक पूर्णपणे बंद राहणार आहे. तर, २१ ते २३ जूनपर्यंत नातेपुतेकडून पुण्याकडे जाणारी वाहतूक माळशिरस, अकलूज, बारामती पूलमार्गे पुण्याकडे वळविण्यात येईल. २१ ते २३ जूनच्या सायंकाळी चारपर्यंत नातेपुतेकडून फलटणमार्गे साताऱ्याकडे येणाऱ्या वाहनांनी शिंगणापूर तिकाटणेमार्गे दहिवडी-सातारा यायचे आहे. नातेपुतेकडून पुण्याकडे जाणाऱ्या वाहनांनी नातेपुते-दहिगाव-जांब-बारामतीमार्गे जातील.

२१ ते २३ जूनच्या दुपारी दोनपर्यंत नातेपुते-वाई-वाठारकडे जाणारी वाहतूक शिंगणापूर तिकाटणे-शिंगणापूर-जावळी-कोळकी-झिरपवाडी-विंचुर्णी-ढवळपाटी-वाठार फाटामार्गे वळविण्यात येणार आहे. २२ जून रोजी पालखी सोहळा हा फलटण येथून बरड मुक्कामी जाणार आहे. यावेळी वाहतूक कोंडी होऊ नये, यासाठी पालखीतील वाहनांनी फलटण-पंढरपूर रस्त्याने बरडकडे जाण्याऐवजी फलटण-दहिवडी चौक, कोळकी, शिंगणापूर तिकाटणे, वडले, पिंप्रद, बरड असे जायचे आहे. वाहनधारकांनी वाहतूक बदलांचे पालन करून सहकार्य करण्याचे आवाहन अधीक्षक शेख यांनी केले आहे.