रुग्णालयातून कोरोनाबाधित पळाला अन् हकनाक कृष्णा नदीत जीव दिला!

वाई (जि. सातारा) : येथील कोविड रुग्णालयात उपचार सुरु असणाऱ्या रुग्णाने आजाराला कंटाळून व नैराश्यातून रुग्णालयातील डॉक्टर, आरोग्य सेविकेला धक्काबुक्की व मारहाण करत पळून जाऊन कृष्णा नदीपात्रात उडी मारून आत्महत्या केली. संचित कोविड रुग्णालयानजीक आज (ता. ६) दुपारी दोनच्या सुमारास ही घटना घडली.

पाचवड (ता. वाई) येथील पासष्ट वयाच्या ज्येष्ठ नागरिक चाचणीमध्ये चार दिवसांपूर्वी कोरोनाबाधित असल्याचे आढळून आले होते. त्यांना वाई येथील संचित कोविड रुग्णालयात उपचारासाठी दाखल करण्यात आले होते. त्यांच्या प्रकृतीत चांगली सुधारणा झाली होती. शनिवारी रात्री त्यांनी मुलाला फोन करून माझी प्रकृती उत्तम आहे, मला आता घरी घेऊन जावा असे म्हणाले होते. मात्र, त्यांना कोरोना आजारामुळे नैराश्य आले होते. त्यामुळे त्यांनी आत्महत्येचा विचार बोलून दाखवला होता. 

रुग्णालयात पोचण्यापूर्वीच त्याला मृत्यूने कवटाळले; सातारा जिल्ह्यातील प्रकार 

पहाटे साडेचारच्या सुमारास त्यांनी रुग्णालयातून कृत्रिम प्राणवायूची यंत्रणा (ऑक्सिजन) काढून फेकून देऊन आरोग्य सेविका व डॉक्टरांना धक्काबुक्की करून पळून गेले. डॉक्टर, आरोग्य सेविका व कर्मचारी यांनी पीपी किट घातल्यामुळे त्यांच्या मागे पळता येत नव्हते. पहाटे डॉ. विद्याधर घोटवडेकर यांना माहिती दिल्यानंतर ताबडतोब डॉक्टरांनी रात्रगस्ती वरील पोलिसांच्या मदतीने पकडून रुग्णालयात आणले. त्यांना समजूत घालून त्यांना विश्रांती घेण्याचा सल्ला दिला. या प्रकाराची नातेवाईकांना कल्पना देण्यात आली. पुढील उपचारात त्यांना खाटेला बँडेज पट्टीच्या साहाय्याने बंधन ठेवले होते. 

सातारकरांनो.. ऑक्‍सिजनची कमतरता भासतेय, मग आम्हाला फोन करा

आपल्याला कोरोना झाला आहे, याचे त्यांना वाईट वाटत होते. त्यांनी घरी सोडण्याची मागणी केली होती. मात्र, उपचार व इंजेक्शनचा डोस पूर्ण होईपर्यंत त्यांना घरी सोडणे शक्य नसल्याचे डॉक्टरांनी सांगितले होते. दोन-तीन दिवसांनी त्यांना घरी सोडण्यात येणार होते. दरम्यान, आज (ता. ६) दुपारी त्यांनी पुन्हा कृत्रिम वायू (ऑक्सिजन) यंत्रणा काढून टाकली. त्यावेळी रुग्णालयातील डॉक्टरांनी व सेविकांना त्यांना प्रतिबंध केला असता, त्यांनी स्वतःच्या ताकदीने बँडेज पट्ट्या तोडून खाटेवरून उठून डॉक्टर व सेविकेला धक्काबुक्की व मारहाण करून संरक्षक दरवाजा तोडून रुग्णालयातून पळ काढला व लगतच्या कृष्णा नदी पात्रात उडी मारली.

वाईतील खवले मांजर तस्करीप्रकरणात रक्षकच बनला भक्षक!

डॉ. घोटवडेकर व सहकारी कर्मचा-यांनी नदी पात्रातून बाहेर काढून रुग्णालयातील कोविड अतिदक्षता विभागात आणले. परंतु, त्यांच्या नाकातोंडात पाणी गेल्याने त्यांचा मृत्यू झाला. यावेळी गणपती घाटावर सिरीयलचे चित्रकरण सुरु असल्याने गर्दी होती. मात्र, त्यांना कोणीही उडी मारण्यापासून रोखले नाही आणि नंतर पाण्यातून काढताना कोणी मदत केली नाही. केवळ बघ्यांची गर्दी होती. या घटनेची नोंद वाई पोलीस ठाण्यात झाली आहे.

संपादन : बाळकृष्ण मधाळे