'ही एकसळचीच पोरं का, हाणारे यांना..; कोरेगावात दोन गटात तुफान राडा

कोरेगाव (सातारा) : कोरेगाव व एकसळ या दोन गावांतील गटांमध्ये हॉकी स्टीक, लाकडी दांडके, दगड, कोयता, चॉपरने झालेल्या मारामारीप्रकरणी पोलिस ठाण्यात परस्पर विरोधी फिर्यादी दाखल झाल्या असून, याप्रकरणी दोन्ही बाजूंकडील 16 जणांना पोलिसांनी अटक केली आहे.

पोलिसांनी दिलेल्या माहितीनुसार, यासंदर्भात रणजित विजय चव्हाण (रा. एकसळ, ता. कोरेगाव) याने दिलेल्या फिर्यादीत म्हटले आहे, की गुरुवारी (ता. २५) दुपारी साडेतीनच्या सुमारास कोरेगाव येथील अजिंक्यनगर येथील कमानीजवळ मी, तसेच मित्र तन्मय विजय भोसले, ओंकार श्रीकांत भोसले (रा. एकसळ) असे आम्ही मित्रांची वाट पाहात थांबलो असताना शुभम सुतार, मदन सुतार, मयूर पंडित, निखिल पंडित, स्वप्नील सुतार, अनिकेत बर्गे, गणेश बर्गे, स्वरूप गुरव (सर्व रा. चौथाई गल्ली, कोरेगाव) यांनी तेथे येऊन ‘ही एकसळचीच पोरं आहेत काय? असे म्हणून आम्हाला हॉकी स्टीक, दांडके दगड, लाथाबुक्क्याने मारहाण करून आमच्या गळ्यातील एक तोळा व अडीच तोळ्याच्या सोन्याच्या चेन कोणीतरी ओढून तोडून नेल्या आहेत. सहायक पोलिस निरीक्षक ए. ए. शिंदे तपास करत आहेत.

दुसरी फिर्याद मयूर धनंजय पंडित (रा. चौथाई गल्ली, कोरेगाव) याने दिली आहे. त्यात म्हटले आहे, की काल (ता. २५) दुपारी साडेतीनच्या सुमारास कोरेगाव येथील अजिंक्य कॉलनीच्या कमानीजवळील फोटो स्टुडिओसमोर केतन भोसले, ऋषिकेश भोसले, रणजित चव्हाण, आकाश जगदाळे, तन्मय भोसले, ओमकार भोसले, सकलिन शेख, अजहर शेख (सर्व रा. एकसळ) व त्यांच्या सोबतच्या अंदाजे दहा ते पंधरा जणांनी मित्र स्वरूप ऊर्फ शंभू गुरव हा चौथाईगल्ली येथे राहतो, या कारणावरून मला, तसेच मित्र शुभम सुतार, मदन सुतार (दोघे रा. चौथाईगल्ली, कोरेगाव) यांना हाताने, लाथाबुक्याने, दांडक्याने, कोयत्याने, चॉपरने मारहाण करून जखमी केले. या वेळी मित्र शुभम सुतार याच्या हातातील मोबाईल त्यांच्यापैकी कोणीतरी घेतल्याचे फिर्यादीत नमूद केले आहे. पोलिस उपनिरीक्षक एस. बी. राऊत तपास करत आहेत.