Minor Girl : पालकांनो, वेळीच काळजी घ्या! घरात झोका खेळताना मान अडकून चिमुरडीचा मृत्यू

वडूज : घरात लोखंडी पाइपला साडी बांधून झोका खेळत असताना त्यामध्ये मान अडकून नऊ वर्षांच्या मुलीचा (Minor Girl) मदुर्दैवी मृत्यू झाला. पौर्णिमा शंकर फाळके (वय ९, रा. तडवळे, ता. खटाव) असं मृत मुलीचं नाव आहे.

याबाबत पोलिसांनी (Police) दिलेल्या माहितीनुसार, पौर्णिमा ही घरातील लोखंडी पाइपला साडी बांधून त्यामध्ये बसून झोका खेळत होती. त्या वेळी झोका खेळताना तिची मान साडीमध्ये अडकून तिच्या गळ्याला फास लागला. तिनं आरडाओरडा केल्यानंतर घरातील लोकांच्या लक्षात हा प्रकार निदर्शनास आला.

घरातील लोकांनी तिच्या मानेचा फास सोडवून तिला येथे रुग्णालयात उपचारासाठी आणले. मात्र, उपचारापूर्वीच तिचा मृत्यू झाल्याचे वैद्यकीय अधिकाऱ्यांनी सांगितले. चिमुकलीच्या दुर्दैवी मृत्यूने परिसरात हळहळ व्यक्त होत आहे. शंकर पोपट फाळके यांनी पोलिस ठाण्यात फिर्याद दिली आहे. महिला पोलिस हवालदार ए. एल. वाघमारे अधिक तपास करीत आहेत.