'भविष्यात भाजप आमदाराच्या पाठीशीच ठाम उभं राहणार'

केळघर : आमदार शिवेंद्रसिंहराजे भोसले (Shivendrasinharaje Bhosle) यांच्या माध्यमातून केळघर परिसरातील प्रलंबित विकासकामे मार्गी लावली जात आहेत. लोकांच्या मागणीनुसार कामेही पूर्ण केली जात आहेत. त्यामुळे गावच्या सर्वांगीण विकासासाठी राजकारण, गट-तट बाजूला ठेवून सर्वांनी एकत्र यावे, असे आवाहन जिल्हा बँकेचे संचालक ज्ञानदेव रांजणे (Dnyandev Ranjane) यांनी केले.

बाहुळे (ता. जावळी) येथे अंतर्गत रस्त्याच्या भूमिपूजनप्रसंगी ते बोलत होते. यावेळी सागर धनावडे, प्रवीण महाराज शेलार, सुनील जांभळे, गणपत ओंबळे, प्रकाश ओंबळे, सुरेश पार्टे, पोलिस पाटील मोहन जाधव, माजी सरपंच जगन्नाथ जाधव, दत्तात्रय जाधव, राजाराम जाधव, शंकर जाधव, किसन जाधव, वसंत जाधव, आनंदा जाधव, अशोक जाधव, रवींद्र जाधव, शांताराम जाधव, कोंडीबा जाधव, लक्ष्मण जाधव, एकनाथ जाधव आदींची प्रमुख उपस्थिती होती.

जिल्हा परिषद सदस्या अर्चना रांजणे यांच्या जिल्हा नियोजन फंडातून हे काम मंजूर झाले असून आगामी काळात आमदार भोसले यांच्या मार्गदर्शनाखाली गावातील साकव पूल, अंतर्गत रस्ते, स्मशानभूमी शेड आदी कामे मार्गी लावली जातील, अशी ग्वाही श्री. रांजणे यांनी यावेळी दिली. याप्रसंगी ग्रामस्थानी रांजणेंच्या माध्यमातून भविष्यात आमदार भोसले यांच्या पाठीशी ठाम उभे राहणार असल्याचा शब्द दिला.