भुकेलेल्यांसाठी माणुसकीचे चार घास

पाचगणी : जिल्ह्यासह इतर जिल्ह्यांतून आठवडा बाजारासाठी दाखल होणारे विक्रेते, मोलमजुरी करणारे तसेच भुकेलेल्यांना ‘माणुसकीसाठी चार घास’ हे ब्रीद उराशी बाळगून येथील तरुणाईने हाती घेतलेल्या अन्नदानाच्या उपक्रमामुळे घरापासून दूर असणारांना एक वेळची ‘रोटी’ देऊन माणसातील माणुसकी जिवंत ठेवली आहे.दोन वर्षांपूर्वी मार्चपासून कोरोनाचे ढग अल्पवधीत गडद झाले आणि काही दिवसांतच मनुष्याची जगण्याची लढाई सुरू झाली. विविध दानशूर, सेवाभावी संस्था गरजूंच्या हाकेला धावून आल्या असतानाच देणारांच्या गर्दीत येथील आठ ते दहा तरुणांची फौज पुढे सरसावली.

मात्र, हे समाजकार्य पार पाडताना कुठल्याही प्रसिद्धीपासून स्वतःला अलिप्त ठेवायचे, याची खूणगाठ त्यांनी बांधली. शहरातील विविध भागांतील उपेक्षितांना गृहोपयोगी साहित्य घरपोच केले. काही महिन्यांपासून कोरोनाचे ढग विरळ झाले. मात्र, समाजसेवेचे व्रत यापुढेही खंडित पडू नये, याची खबरदारी घेत या तरुणाईने दर बुधवारी जिल्ह्यातून, बाहेर जिल्ह्यांतून बाजारपेठेत दाखल होणाऱ्या विक्रेत्यांसाठी अन्नदान करण्याची संकल्पना आखली. त्यानुसार आठवडा बाजारात शिवाजी चौकात दुपारी १२ वाजता खरेदी करण्यासाठी दाखल होणारे मजूर तसेच शहर व परिसरातून येणाऱ्या २५० ते ३०० गोरगरिबांना अन्नदान केले जाते. दर आठवड्याला मेनू वेगवेगळ्या प्रकारचा असतो.

ही तरुणाई जरी प्रसिद्धीपासून अलिप्त असली तरी अन्नदानाची संकल्पना ही आम्हाला मित्र इम्रान इनामदार यांच्याकडून मिळाली असल्याचे सांगतात. तरुणाईचा अन्नदानाचा उपक्रम स्तुत्य असल्याने अनेक जण सढळ हाताने मदतीसाठी पुढे सारसावू लागले आहेत.

अन्नदानाचा हा उपक्रम लॉकडाउनपूर्वी इम्रान इनामदार यांच्या मार्गदर्शनाखाली आठ ते दहा जणांनी सुरू केला. कोरोना काळात हा उपक्रम खंडित झाला असला तरी आम्ही त्या काळात गृहोपयोगी वस्तू वाटल्या.

- उपक्रम राबवणारे तरुण