शिल्लक गणेशमूर्तींमुळे व्यावसायिक अडचणीत, कोरोनामुळे फिस्कटले कारागिरांचे आर्थिक गणित

ढेबेवाडी (जि. सातारा) : कोरोनाच्या वाढत्या प्रभावामुळे येथील बाजारपेठ मध्यंतरी अनेक दिवस बंद ठेवल्याचा जबर फटका गणेशमूर्ती कारागीर आणि स्टॉलधारकांना बसला. प्रतिवर्षी गणेश चतुर्थीला रिकामेपणाची हुरहूर खायला उठणाऱ्या त्यांच्या घरात व स्टॉलवर शनिवार (ता. २२) मोठ्या प्रमाणात गणेशमूर्तीं शिल्लक राहिल्याने चिंतेचे वातावरण दिसून आले. 

कोरोनाचे रुग्ण आणि त्यांच्या निकट सहवासातील काही व्यक्ती ढेबेवाडी बाजारपेठेच्या संपर्कात आल्याचे समोर आल्याने खबरदारीचा उपाय म्हणून गेल्या काही दिवसांत अनेकदा बाजारपेठ बंद ठेवावी लागली. त्याचा सर्वाधिक फटका अन्य व्यावसायिकांबरोबर गणेशमूर्ती कारागीर आणि स्टॉलधारकांना बसला. कारागिरांनी नेहमीप्रमाणे बाजारपेठेत भाड्याने गाळे घेऊन त्यांच्याकडील मूर्ती मांडल्या. अनेक व्यावसायिकांनीही स्थानिक कारागीर, तसेच कऱ्हाड, उंब्रज, मसूर, कोल्हापूर येथून गणेशमूर्ती आणल्या.

शाहूनगरीत हर्षोल्हासात बाप्पांचं आगमन 

मात्र, वारंवार बंद होणारी बाजारपेठ, तसेच ठप्प झालेली अंतर्गत वडाप व एसटी वाहतूक यामुळे मूर्ती ठरविण्यासाठी ढेबेवाडीत येणाऱ्यांचा ओघ कमी झाला होता. अशा स्थितीत काही ठिकाणी स्थानिकांनी गावातच मूर्तींचे स्टॉल सुरू करून नागरिकांना पर्याय उपलब्ध करून दिल्याने येथील परंपरागत कारागीर व व्यावसायिकांसमोर अडचणी अधिकच वाढल्या. `एक गाव, एक गणपती'मुळे अनेक गणेश मंडळांनी ठरविलेल्या मूर्ती ऐनवेळी रद्द केल्याने अडचणी वाढलेल्या असतानाच आजूबाजूच्या गावातून नेहमीसारखा प्रतिसाद न मिळाल्याने चिंतेत असलेले व्यावसायिक व कारागीर गणेश चतुर्थी दिवशी तरी गर्दी वाढेल या आशेवर होते. 

मुस्लिम कुटुंबियांच्या पुढाकाराने कोरोनाबाधित कुटुंबात उत्सवास प्रारंभ

मात्र, त्यांची निराशाच झाली. गर्दी टाळण्यासाठी ग्रामपंचायतीने काढलेल्या नोटिसा आणि पोलिसांकडून त्याबाबत केल्या जाणाऱ्या अंमलबजावणीचा घोळ मिटवता मिटवता सकाळी काही तास त्यांची पुरेवाट झाली. नंतर दिवसभर बाजारपेठेत सन्नाटाच राहिल्याने शिल्लक राहिलेल्या गणेशमूर्ती सायंकाळी घरांकडे हलविण्यासाठी कारागिरांची लगबग सुरू होती. कोरोनामुळे उद्‌भवलेल्या परिस्थितीमुळे यंदा फटका बसल्याचे अनेक कारागीर व व्यावसायिकांनी सांगितले.

संपादन : बाळकृष्ण मधाळे