Hotel The Fern : 'हॉटेल फर्न'ला उच्च न्यायालयाचा मोठा दणका; 'इतक्या' लाखांचा ठोठावला दंड, काय आहे प्रकरण?

पाचगणी : पाचगणी येथील हॉटेल द फर्नवर (Hotel The Fern at Panchgani) पालिकेच्या वतीने सील लावण्यात आले होते. या कारवाईच्या विरोध उच्च न्यायालयात (High Court) आव्हान देण्यात आले होते. न्यायालयाच्या वतीने ही याचिका फेटाळून हॉटेल प्रशासनाला दहा लाख रुपयांचा दंड ठोठावला आहे.

याबाबत पाचगणी नगरपालिकेचे (Panchgani Municipality) मुख्याधिकारी निखिल जाधव यांनी दिलेल्या माहितीनुसार, पाचगणी येथील प्लॉट नंबर ५५५ या मिळकतीत बांधलेली इमारत ही रहिवासासाठी बांधण्यात आली होती; परंतु या इमारतीचा हॉटेल द फर्नकडून व्यवसायासाठी वापर केला जात होता. दरम्यान, नगरपालिका प्रशासनाच्या वतीने कारवाई करत मे महिन्यामध्ये सील करण्यात आली होती.

पालिकेच्या या कारवाईच्या विरोधात चांदणी रियाल्टी यांनी उच्च न्यायालयात याचिका दाखल केली. न्यायालयाने ती फेटाळताना मुख्य इमारतीच्या टेरेसवरील विनापरवाना शेड तीन महिन्यांचे आत काढून घ्यावे, तसेच इमारतीचा वापर मंजूर नकाशात दाखविल्याप्रमाणे स्लोपिंग रूफ करावे. त्याचबरोबर मागील बाजूला असणारी सर्व्हे नंबर १४/ए/२ चे मिळकतीचे सीलबंद कायम राहणार आहे; परंतु मुख्य इमारतीचे सील काढताना सदर इमारत वापर हा फक्त रहिवासासाठीच करणे बंधनकारक राहील.

याचिकाकर्त्याने ब्रेड ॲण्ड बटरचे महाराष्ट्र राज्य पर्यटन विकास महामंडळाचे दोन रूमचे लायसन काढून तब्बल ७० रूमच्या माध्यमातून व्यावसायिक वापर केला. यामुळे उच्च न्यायालयाने दहा लाख रुपयांचा निधी कीर्तिकर लॉ लायब्ररीसाठी दोन आठवड्यांत जमा करावेत. असे आदेश पारित करण्यात आल्याचे मुख्याधिकारी जाधव यांनी सांगितले. उच्च न्यायालयाच्या या निर्णयाचा पाचगणी- महाबळेश्वरमधील अनेक व्यावसायिकांनी धसका घेतला असून, अशा इमारती वापरकर्त्यांवर आता नगरपालिका लक्ष करणार काय? याचीच चर्चा सर्वत्र सुरू आहे.