सातारा : कराड अर्बन बँकेने नाव अर्थविश्वात कोरले

कऱ्हाड : कराड अर्बन बँकेने सामाजिक बांधिलकी जपत अर्थविश्वात नाव अधोरेखित केले आहे, असे गौरवोद्गार सहकार तथा पालकमंत्री बाळासाहेब पाटील यांनी काढले. बँकेच्या १०५ व्या वर्धापनदिनानिमित्त झालेल्या कार्यक्रमात ते बोलत होते. यावेळी कराड अर्बन बँकेचे अध्यक्ष डॉ. सुभाष एरम, कुटुंबप्रमुख सुभाषराव जोशी, उपाध्यक्ष समीर जोशी, मुख्य कार्यकारी अधिकारी दिलीप गुरव उपस्थित होते. यावेळी मुख्य कार्यालयात विविध कार्यक्रम पार पडले. अर्बन कुटुंबप्रमुख जोशी व बँकेचे अध्यक्ष डॉ. एरम यांच्या हस्ते सहकारमंत्री पाटील यांचा सत्कार झाला.

यावेळी बँकेच्या सेवक प्रशिक्षण व संशोधन केंद्राच्या माहिती पुस्तिकेचे प्रकाशन सहकारमंत्री पाटील यांच्या हस्ते झाले. सहकारमंत्री पाटील म्हणाले, ‘‘कराड अर्बन बँकेच्या अद्ययावत सेवक प्रशिक्षण व संशोधन केंद्रातर्फे सहकारात कमी होत असलेल्या युवकांची संख्या वाढविण्याच्या उद्देशाने प्रबोधनपर उपक्रम राबवावेत. डॉ. द. शि. एरम, सुभाषराव जोशी यांनी भविष्यात येणारे बदल आत्मसात करत व्यावसायिकतेला प्राधान्य दिल्यामुळे बँकेची सर्वांगीण प्रगती तीही गुणात्मकता टिकवून साध्य झाली आहे.’’ कुटुंबप्रमुख जोशी यांनी मनोगत व्यक्त केले. बँकेचे अध्यक्ष डॉ. एरम यांनी स्वागत करून प्रास्ताविक केले. बँकेचे मुख्य कार्यकारी अधिकारी गुरव यांनी सूत्रसंचालन केले. सेवक प्रशिक्षण व संशोधन केंद्राचे प्राचार्य दिलीप देशपांडे यांनी आभार मानले.