आशांचे आजपासून कामबंद आंदोलन; उद्या पालकमंत्र्यांना भेटणार

कऱ्हाड ः आशा स्वयंसेविका आणि गटप्रवर्तकांना चार ते पाच महिन्यांपासून पगार मिळालेला नाही. त्याचबरोबर लसीकरणाचा भत्ताही दिला जात नाही. याच्या निषेधार्थ आज बुधवारी येथील तहसील कार्यालयासमोर आशा व गटवप्रर्तक यांनी निदर्शने केले. पगार आणि वाढीव भत्ता मिळेपर्यंत उद्यापासून कामबंद आंदोलन करण्याचा निर्धार करत उद्या (गुरुवारी) पालकमंत्री यांनी भेटुन व्यथा मांडण्यात येतील असे जाहीर करण्यात आले.

कऱ्हाड (जि.सातारा) येथील तहसील कार्यालयासमोर आनंदी आवघडे यांच्या नेतृत्वाखाली आंदोलन करण्यात आले. यावेळी तालुक्यातील आशा स्वयंसेविका, गटप्रवर्तक, माणिक अवघडे उपस्थित होते. तहसील कार्यालयासमोर जोरदार घोषणाबाजी करत आशांनी तहसीलदार विजय पवार, सभापती प्रणव ताटे, गटविकास अधिकारी शशिकांत शिंदे यांना निवेदन दिले. निवेदनातील माहिती अशीः राज्य सरकारने लवकरात लवकर आशा स्वयंसेविका, गटप्रवर्तकांच्या मानधनाचा प्रश्न मार्गी लावावा. जोपर्यंत पगार मिळत नाही तोपर्यंत उद्यापासुन काम बंद करण्यात येत आहे. आशा, गटप्रवर्तकांवर कामाचा ताण मोठ्या प्रमाणावर वाढवलेला आहे, मात्र पगार दिले जात नाहीत. पुढच्या पंधरा दिवसांवर दिवाळी सण येवून ठेपला आहे. तरीही पगार नाही, लसीकरणाचा भत्ता नाही. त्यामुळे आशा स्वयंसेविका उद्या पालकमंत्री बाळासाहेब पाटील यांना भेटुन पगार व भत्याची मागणी करणार आहेत.

सकाळ चाही पाठपुरावा

आशा स्वयंसेविका आणि गटप्रवर्तक यांनी कोरोना काळात जीवाची पर्वा न करता काम करुन शासनाला अद्ययावत माहिती दिली. त्यांना तुटपुंजे मानधन मिळते. त्यावर त्यांचे कुटुंब चालते. मात्र त्यांनी जोखमीचे काम करुनही त्यांना पाच महिन्यांपासुन पगार न मिळाल्याने त्यांच्यावर मोठे बिकट संकट आले आहे. त्यासंदर्भात दैनिक सकाळ नेही लक्ष वेधुन त्यांची व्यथा मांडली आहे.