लग्नाच्या वाढदिवशीच विजयश्रीचा हा अनोखा योगायोग जुळून आला. त्यामुळं जगदाळे कुटुंबीयांच्या आनंदात दुग्धशर्करा योग निर्माण झाला.
वडूज (सातारा) : येथील कृषी उत्पन्न बाजार समितीच्या निवडणुकीत खटाव विकास आघाडीच्या महिला राखीव मतदारसंघातील उमेदवार लता आनंदा जगदाळे या विजयी झाल्या. त्यामुळं त्यांचे पती आनंदा जगदाळे यांनी स्वतः औक्षण करून आपल्या पत्नीचं कौतुक केलं.
विशेषत: जगदाळे दांपत्याच्या लग्नाच्या विसाव्या वाढदिवशीच त्यांना बाजार समिती निवडणुकीतील विजयश्री मिळाली. जगदाळे यांच्या औक्षणाची व लग्नाच्या वाढदिवसाच्या या दुग्धशर्करा योगायोगाची नागरिकांत चर्चा होत आहे.
बाजार समितीच्या निवडणुकीत माजी आमदार प्रभाकर घार्गे यांच्या नेतृत्वाखालील खटाव तालुका विकास आघाडी व राष्ट्रवादी, स्वाभिमानी शेतकरी संघटना पुरस्कृत शेतकरी सहकार पॅनेल यांच्यात दुरंगी व चुरशीची लढत झाली. निवडणुकीत खटाव तालुका विकास आघाडीनं १८ पैकी १३ जागा जिंकत बाजार समितीवरील सत्ता कायम ठेवली. निवडणुकीत खटाव तालुका विकास आघाडीतून महिला उमेदवार सौ. जगदाळे व सुनीता मगर या विक्रमी मतांनी निवडून आल्या. जगदाळे यांचे माहेर वेळू (ता. कोरेगाव) तर सासर पेडगाव (ता.खटाव) आहे.
बाजार समिती निवडणुकीत सौ. जगदाळे या विजयी झाल्या. शिवाय, लग्नाच्या वाढदिवशीच विजयश्रीचा हा अनोखा योगायोग जुळून आला. त्यामुळं जगदाळे कुटुंबीयांच्या आनंदात दुग्धशर्करा योग निर्माण झाला. एका कर्तबगार महिलेनं विजय संपादन केल्याबद्दल त्यांचाही गुणगौरव व्हावा. या भावनेतून पती आनंदा जगदाळे यांनी पत्नी जगदाळे यांचे पारंपारिक पद्धतीनं औक्षण केलं. यावेळी सासू श्रीमती सरूबाई जगदाळे, विद्या कोळी, कल्पना जाधव, सारिका घार्गे, संगीता दबडे आदी महिला उपस्थित होत्या. सध्या सहकार क्षेत्रामध्येही महिलांची कर्तबगारी दिसून येत आहे. त्यामुळे वरिष्ठांनी बाजार समितीच्या अध्यक्षपदाची सौ. जगदाळे यांना संधी द्यावी, अशी मागणी सोसायटी व ग्रामपंचायत, तसेच महिला वर्गातून होत आहे.
बाजार समितीच्या निवडणुकीत खटाव तालुका विकास आघाडीतून पत्नी लता यांना वरिष्ठांनी उमेदवारीची संधी दिली. मतदारांनीही त्यांना चांगले मताधिक्क्य देऊन विजयी केले. त्याबद्दल सर्वांचे आभार. पत्नी लता यांनी या निवडणुकीच्या निमित्ताने स्वत:मधील गुणवत्ता सिध्द केल्याने त्यांच्या कर्तुत्वाचे विजयी औक्षण करताना आनंद होत आहे. आमच्या लग्नाच्या वाढदिवशीच ही विजयाची मिळालेली अनोखी भेट आयुष्यभर कायम लक्षात राहील, असं आनंदा जगदाळे यांनी सांगितलं.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
