लॉकडाउनमुळे झेंडू कोमेजला, कोरोनाने बळीराजा हिरमुसला!

मसूर (सातारा) : झेंडू उत्पादक शेतकऱ्यांना लॉकडाउन व संचारबंदीचा मोठा फटका बसला आहे. गुढीपाडव्याला होणारी विक्रीची उलाढालही झाली नाही. त्यातच मागणी नसल्याने बाजारपेठेत दरच नाही. त्यामुळे शेतकऱ्यांना मोठा फटका बसल्याने झेंडू उत्पादकांच्या तोंडचे पाणी पळाले आहे.

गुढीपाडव्यास 60 दिवसांचा अवधी असतानाच झेंडूची लागण केली जाते. शेती पिकांत कोणी नुसतीच झेंडूची लागण करतात. एक रोप तीन रुपये याप्रमाणे खरेदी केली जाते. खते फवारणी केल्यानंतर 60 दिवसांनी त्याचे उत्पादन सुरू होते. ज्यावेळी लागण केली. त्या वेळी राज्यात कोरोनाचे सावट कमी प्रमाणात होते. सध्या कोरोना रुग्णांच्या संख्येत दररोज मोठ्या संख्येची भर पडत असल्याने शासनाने लॉकडाउनची घोषणा केली आहे. त्यातच गुढीपाडवा या सणाला फुलांचा उठाव पाहिजे त्या प्रमाणात झाला नाही.

कोयना-कृष्णेच्या प्रीतिसंगमावर सापडला 18 व्या शतकातील अप्रकाशित 'शिलालेख'

साधारण प्रतिकिलो 50 रुपये याप्रमाणे जर दर मिळेल, अशी अपेक्षा होती; पण ती फोल ठरली. झेंडूची विक्री करता आली नाही. परिणामी, फूल उत्पादकांना आर्थिक फटका सहन करावा लागला. त्यातच प्रशासनाने मंदिरे बंद ठेवण्याचे आदेश दिल्याने फुलांची विक्री बंद झाली आहे. कमी दिवसात मेहनत घेऊन तयार केलेले उत्पादन विक्रीअभावी वाया जात आहे. त्यामुळे झेंडू उत्पादक शेतकरी हवालदिल झाले आहेत.

पिंपोड्यात 65 हेक्‍टर पिकांची मोठी हानी; शेतकऱ्यांना अश्रू अनावर

मागील वर्षीही कोरोनामुळे गुढीपाडवा, अक्षय तृतीया, दसरा- दिवाळी सणांसह लग्न व इतर समारंभासाठी फुलांची विक्री झाली नाही. त्यामुळे आर्थिक घडीच विस्कटली असून, हे नुकसान न भरून येणारे आहे.

-प्रकाश माळी, फूल उत्पादक शेतकरी

Edited By : Balkrishna Madhale