Loksabha Election : लोकसभा तोंडावर असतानाच उदयनराजे भाजपवर नाराज? बावनकुळे म्हणाले, त्यांच्या मनात कुठलीही..

फलटण शहर : खासदार उदयनराजे (Udayanraje Bhosale) हे नियमितपणे माझ्याशी बोलत असतात, त्यामुळे माझ्या व पक्षाबाबत त्यांच्या मनामध्ये कुठलीही नाराजी नाही, असे सांगत तिकीट मागण्याचा अधिकार पक्षाच्या बूथ कार्यकर्त्यालाही भाजपमध्ये आहे. कारण तो पक्षाचे व समाजाचे काम करत असतो, त्यामुळे ज्यावेळी पक्षाकडून उमेदवारीचा निर्णय होतो, तेव्हा आमचे सर्व कार्यकर्ते कामाला लागतात, असे भाजपचे प्रदेशाध्‍यक्ष चंद्रशेखर बावनकुळे यांनी सांगितले.

फलटण येथे पत्रकारांशी संवाद साधताना ते बोलत होते. लोकसभेच्या जागांवर मित्रपक्षांनी दावा करणे, हे युतीच्या राजकारणामध्ये होत असते; परंतु अद्याप केंद्रीय पार्लमेंटरी बोर्डाने कुठले सीट कोणाला जाईल, याबाबत चर्चा केली नाही. मात्र, मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार हे आमचे राज्यातील नेते व केंद्रीय नेतृत्व बसून याबाबत निर्णय घेतील व जो निर्णय होईल त्याबाबत कोणाच्याही मनामध्ये किंतू परंतु नसेल, असे बावनकुळेंनी (Chandrashekhar Bawankule) स्पष्ट केले.

ते म्हणाले, ‘‘कोण कुठे लढणार आहे, हे आम्हाला महत्त्वाचं नाही. आम्ही जिंकण्यासाठी लढणार आहोत. मित्रपक्षांच्या उमेदवारांपाठीमागे भाजप पूर्ण ताकदीने उभा राहील, तर भाजपच्या उमेदवारांच्या मागे आमच्या महायुतीतील ११ पक्ष ताकदीने उभे राहतील, त्यामुळे आम्ही राज्यात ४५ पेक्षा जास्त जागा जिंकू व त्यामध्ये नांदेडसह बारामतीचाही समावेश असेल,’’ असा दावाही बावनकुळे यांनी यावेळी केला.

माढा लोकसभा मतदारसंघात भाजपच मारणार बाजी

माढा लोकसभा मतदारसंघामध्ये खासदार रणजितसिंह नाईक-निंबाळकर यांनी मोठ्या प्रमाणात विकासकामे आणली आहेत. सर्वांत जास्त विकासकामे आणणाऱ्या देशातील पहिल्या दहा खासदारांमध्ये निंबाळकर यांचा समावेश आहे, असे निदर्शनास आणून देत माढा लोकसभा मतदारसंघांमध्ये बुथनिहाय ५१ टक्के मते घेऊन महायुतीचा उमेदवार प्रचंड बहुमताने विजयी होईल, असेही ते म्हणाले.