Police Bharti 2024 : 'इतक्या' पदांसाठी साताऱ्यात उद्यापासून पोलिस भरती; तब्बल एक लाखांहून अधिक उमेदवारांनी भरला अर्ज

सातारा : जिल्हा पोलिस दलाच्या वतीने (Satara Police Force) २३५ पदांसाठी बुधवारपासून (ता. १९) भरती प्रक्रिया राबविण्यात येणार आहे. सकाळी सात वाजल्यापासून ते सायंकाळी उशिरापर्यंत भरती (Satara Police Bharti) प्रक्रिया येथील पोलिस कवायत मैदानावर सुरू राहणार आहे. पोलिस दलातील विविध पदांसाठी तब्बल एक लाख तीन हजार ३० उमेदवारांनी अर्ज भरल्याची माहिती आज पोलिस अधीक्षक समीर शेख यांनी पत्रकार परिषदेत दिली.

शेख म्हणाले, ‘‘पोलिस दलात २३५ पदांमध्ये ३९ पदे ही चालक पदासाठी, तर पोलिस कॉन्स्टेबल व बँड वादकांसाठी एकूण १९६ पदे आहेत. उमेदवारांनी ज्या पदासाठी अर्ज केला आहे त्याची प्रवेशपत्र त्यांना तत्काळ दिले जाणार असून, शैक्षणिक कागदपत्रे तपासण्यासाठी चार टेबलांची व्यवस्था करण्यात आली आहे. शैक्षणिक प्रमाणपत्रांचे दोन छायांकित संच, सहा पासपोर्ट साईज फोटो व जात प्रमाणपत्र या भरतीसाठी अनिवार्य आहे.

तसेच उमेदवारांनी साताऱ्यासह अन्य जिल्ह्यांमध्ये प्रवेश भरतीसाठी अर्ज केला असल्यास व एकाच दिवशी अन्य ठिकाणची मैदानी चाचणी असल्यास त्या उमेदवारांना दुसरी तारीख देण्यात येईल. कागदपत्रांची छाननी त्यानंतर शारीरिक क्षमता चाचणी, तसेच १६०० मीटर धावणे, १०० मीटर धावणे व गोळाफेक अशा निकषांमधून पार पडलेल्या उमेदवारांची पोलिस दलाच्या संकेतस्थळावर गुणवत्ता यादी प्रसिद्ध केली जाणार आहे.

...तर उमेदवारास दुसरी तारीख मिळणार

उमेदवारांनी साताऱ्यासह अन्य जिल्ह्यांमध्ये प्रवेश भरतीसाठी अर्ज केला असल्यास व एकाच दिवशी अन्य ठिकाणची मैदानी चाचणी असल्यास त्या उमेदवारांना दुसरी तारीख देण्यात येईल.

युवकांच्या निवासाची सोय

भरतीसाठी येणाऱ्या युवकांना राहण्याची मोठ्या प्रमाणात गैरसोय होते. त्यासाठी पोलिस करमणूक केंद्राचा हॉल, शाहू स्टेडियम या ठिकाणी मैदानी चाचणीच्या एक दिवस अगोदर निवासाची सोय करण्यात आली आहे. पोलिस दलाने केलेल्या या उपाययोजनेमुळे गरजू मुलांची गैरसोय दूर होणार आहे.

ही पदे भरली जाणार...

• चालक : ३९

• पोलिस कॉन्स्टेबल व बँड वादक : १९६

आवश्‍यक कागदपत्रे

• शैक्षणिक प्रमाणपत्रांचे दोन छायांकित संच

• सहा पासपोर्ट साईज फोटो

• जात प्रमाणपत्र