Manoj Jarange : 250 किलो फुलांचा 15 फुटी हार अन् 10 जेसीबीतून मनोज जरांगेंवर पुष्पवृष्टी; कराडात भव्य स्वागत

कऱ्हाड : एक मराठा.. लाख मराठा..., आरक्षण (Maratha Reservation) आमच्या हक्काचे.. नाही कोणाच्या बापाचे, कोण म्हणतो देत नाय.. घेतल्याशिवाय राहत नाय..., मनोज जरांगे तुम आगे बडो.. हम तुम्हारे साथ है..., जय भवानी.. जय शिवराय... या जयघोषात मनोज जरांगे-पाटील (Manoj Jarange-Patil) यांचे मराठा समाजाच्या वतीने २५० किलो फुलांचा १५ फुटी हार घालून जेसीबीव्दारे पुष्पवृष्टी करत कऱ्हाडला (जि. सातारा) जंगी स्वागत करण्यात आले.

मराठा समाजाला ओबीसीतून आरक्षण मिळावे, सगेसोयरे यांना कुणबी दाखल्यांचे आरक्षण लागू करावे यासह अन्य मागण्यांसाठी मनोज जरांगे-पाटील यांनी महाराष्ट्रात मोठा लढा उभा केला आहे. त्याला मराठा समाजाचाही चांगला पाठिंबा मिळत आहे. जरांगे-पाटील यांच्याकडून महाराष्ट्रात शांतता रॅलीचे आयोजन करण्यात आले आहे.

त्याअंतर्गत आज शनिवारी साताऱ्यात शांतता रॅली होणार आहे. त्यासाठी जरांगे-पाटील कोल्हापूरवरुन कऱ्हाडमार्गे आज साताऱ्याला रवाना होण्यापूर्वी कऱ्हाडच्या पाटण तिकाटणे येथे काहीकाळ थांबले होते. त्यादरम्यान त्यांचे कऱ्हाडमध्ये त्यांच्यावर जेसीबीव्दारे मराठा समाजाच्या वतीने फुलांचा वर्षाव करुन स्वागत करण्यात आले. त्याचबरोबर क्रेनच्या सहाय्याने २५० किलोचा १५ फुटी हार घालून त्यांचे स्वागत करण्यात आले. त्यांच्या स्वागताला उपस्थित राहून साताऱ्याच्या रॅलीस जाण्यासाठी मराठा समाजाचे समन्वयक, तरुण, महिला, तरुणी मोठ्या प्रमाणात उपस्थित होत्या.

यावेळी मनोज जरांगे तुम आगे बडो.. हम तुम्हारे साथ है..., एक मराठा.. लाख मराठा... या घोषणांनी सारा परिसर दणाणून गेला. जरांगे-पाटील यांच्या स्वागतानंतर त्यांच्यासोबत मराठा समाजाचे आबालवृध्द साताऱ्याला रवाना झाले. मनोज जरांगे-पाटील यांच्या दौऱ्यासाठी कऱ्हाडचे पोलिस उपाधीक्षक अमोल ठाकुर, कऱ्हाड शहर पोलिस ठाण्याचे वरिष्ठ शहर पोलिस निरीक्षक के. एन. पाटील, कऱ्हाड तालुका पोलिस निरीक्षक महेंद्र जगताप यांनी मोठा पोलिस बंदोबस्त तैनात केला होता.