छत्रपती शिवाजी महाराज कोविड केअर सेंटरसाठी मराठा क्रांती मोर्चाचा पुढाकार

फलटण शहर : येथे वाढलेला कोरोनाचा प्रादुर्भाव व ऑक्‍सिजन बेडअभावी होणारे मृत्यू रोखण्यासाठी येथील मराठा क्रांती मोर्चाद्वारे छत्रपती शिवाजी महाराज कोविड केअर सेंटर उभारून त्यात सर्वसोयींनीयुक्त आणि ऑक्‍सिजन युनिटसह ताबडतोब 20 व टप्प्याटप्प्याने अजून 20 असे एकूण 40 बेड्‌स उपलब्ध होणार असून, या रुग्णालयात डॉक्‍टरसह इतर सर्व सोयी उपलब्ध होणार आहेत.
 
सुरक्षित शारीरिक अंतर राखत झालेल्या बैठकीत प्रांताधिकारी डॉ. शिवाजीराव जगताप, प्रभारी तहसीलदार आर. सी. पाटील, मुख्याधिकारी प्रसाद काटकर, पोलिस उपअधीक्षक तानाजी बरडे यांनी कोरोनाचा मुकाबला करण्यासाठी समाजातील दानशूर व्यक्तींनी पुढे येत आर्थिक मदत करावी, असे आवाहन केले. या आवाहनाला प्रतिसाद देत मराठा क्रांती मोर्चा फलटण यांनी पुढे येत सद्यःस्थितीत शहर व तालुक्‍यातील लोकांसाठी "एक हात मदतीचा' याप्रमाणे मोर्चाची बैठक आयोजित करून त्यामध्ये कोविड रुग्णांना येणाऱ्या अडचणी सोडवण्यासाठी आपण पुढे येऊन प्रशासनाला व आपल्या लोकांना मदत करण्याचा सर्वानुमते ठराव करत सेंटर सुरू करण्याचा निर्णय घेण्यात आला.

शिवविचार खरंच आपण अंमलात आणतो का? : अश्विनी महांगडे 

त्यानंतर हे रुग्णालय कुठे उभ करावयाचे अशी चर्चा झाली असता सद्‌गुरू व महाराजा उद्योगसमूहाचे संस्थापक अध्यक्ष दिलीपसिंह भोसले यांनी स्वतः हे रुग्णालय उभे करण्यासाठी आपली शाळा देण्याचे जाहीर केले, तसेच तेथे स्वच्छता, पिण्याचे पाणी व इतर लागणाऱ्या सर्व सुविधा देण्याचे आश्वासन दिले. रुग्णालयात डॉक्‍टर, नर्स व कर्मचारी आम्ही उपलब्ध करून देणार असल्याचे तहसीलदार पाटील यांनी स्पष्ट केले. कोविड रुग्णालयात उपचारासाठी लागणाऱ्या सुविधा व सामग्रींबाबत चर्चा करून संबंधितांना बोलावून सर्वांसमोर हे कोविड रुग्णालय उभारण्याचे काम दिले. या वेळी जमा झालेली आर्थिक मदतही देण्यात आली. सुरुवातीला ऑक्‍सिजनसह तातडीने 20 बेड्‌स उभारले जाणार आहे. हे 20 बेड्‌सचे रुग्णालय उभारल्यानंतर आठ दिवसांत अधिकचे 20 बेड्‌स ऑक्‍सिजनसह उभारण्यात येणार आहेत, असे क्रांती मोर्चाकडून सांगण्यात आले आहे.

महाबळेश्वरातील पथारी व्यावसायिक होऊ लागलेत आत्मनिर्भर; कसे ते वाचा

Edited By : Siddharth Latkar