Maratha Reservation : मनोज जरांगेंच्या उपोषणाला कऱ्हाडकरांचा पाठिंबा; बंदला उत्स्फूर्त प्रतिसाद

कऱ्हाड : एक मराठा.. लाख मराठा.., आरक्षण (Maratha Reservation) आमच्या हक्काचे... नाही कुणाच्या बापाचे.., कोण म्हणतंय देत न्हाय.., घेतल्याशिवाय रहात न्हायं.... या ना अशा घोषणा देत मराठा समाजाच्यावतीने आज बुधवारी दुचाकी रॅली काढून कऱ्हाड (जि. सातारा) बंदची हाक देण्यात आला. त्याला कऱ्हाड शहरात व्यापाऱ्यांचा पाठिंबा मिळाला.

राज्य सरकारने आश्वासित केल्याप्रमाणे सगे-सोयरे अध्यादेशाचे कायद्यात रूपांतर करावे व लवकरात लवकर अंमलबजावणी सुरू करावी, या मागणीसाठी मनोज जरांगे पाटील (Manoj Jarange Patil) यांचे अंतरवाली सराटी येथे आमरण उपोषण सुरू आहे. त्यांना पाठिंबा देण्यासाठी मोठ्या संख्येने मराठा बांधवांनी आज महाराष्ट्र बंदची हाक दिली आहे.

बंद हा शांततेत व संयमात असला पाहिजे, जाळपोळ उद्रेकास मराठ्यांचा पाठिंबा नाही, असेही जरांगे पाटील यांनी सूचित केले आहे. त्याचा विचार करुन कऱ्हाड तालुका सकल मराठा समाजाची काल तातडीची बैठक कऱ्हाडला झाली. त्यात जरांगे-पाटील यांच्या उपोषणाला पाठिंबा देण्यासाठी आणि त्यांनी जी मागणी केली आहे.

ती सरकारकडून पूर्ण व्हावी यासाठी कऱ्हाड तालुका मराठा समाजाच्यावतीने तालुक्यामध्ये शांततेच्या मार्गाने बंद जाहीर करण्याचे ठरवण्यात आले. त्याला सर्वांनी पाठिंबा द्यावा, असेही आवाहन मराठा समाजाच्या वतीने करण्यात आले होती. आज सकाळी मराठा समाजाच्यावतीने दुचाकी रॅली काढून कऱ्हाड बंदचे आवाहन करण्यात आले. त्याचा व्यापाऱ्यांचा प्रतिसाद मिळाला.