Maratha Reservation : साताऱ्यातून अंतरवालीकडे जाणार लाखो मराठे

सातारा - मराठा आरक्षणाच्या मुद्द्याने राज्यभर पुन्हा उचल घेतली आहे. या मुद्द्यासाठी ‘करो या मरो’ची भूमिका घेतलेल्या मनोज जरांगे-पाटील यांना साथ देण्यासाठी जिल्ह्यातील मराठा समाज सरसावला आहे.

त्यातूनच मराठा आरक्षणासाठी अंतरवाली सराटी (ता. अंबड, जि. जालना) येथे १४ ऑक्टोबरला आयोजित केलेल्या मराठा महासभेचा आवाज बुलंद करण्यासाठी राजधानी साताऱ्यातून तब्बल एक लाख मराठा मैदानात उतरण्याच्या तयारीत आहेत. मराठा क्रांती मोर्चाचे समन्वयक, विविध मराठा संघटनांबरोबरच सर्वसामान्य मराठ्यांच्या वैयक्तिक पातळीवरही सभेला जाण्याच्या नियोजनाने वेग घेतला आहे.

मराठा आरक्षणाच्या मागणीसाठी मनोज जरांगे-पाटील यांनी जालना जिल्ह्यातील अंतरवाली सराटी येथे उपोषण सुरू केले होते. या उपोषणकर्त्यांवर झालेल्या लाठीहल्ल्यामुळे अंतरवाली सराटी व मनोज जरांगे-पाटील यांच्याकडे संपूर्ण राज्याचे लक्ष वेधले गेले.

प्रसिद्धी माध्यमे व शासनानेही या आंदोलनाची गांभीर्याने दखल घेतली. त्यातून जरांगे यांची मराठा आरक्षणाची भूमिका राज्यातील सर्व मराठा समाजातील घराघरांत पोचली. गेले दीड महिना मनोज जरांगे हे राज्यातील प्रत्येक मराठा समाजातील घरात चर्चेचा विषय बनले. निःस्वार्थ व ठामपणे आंदोलन करणारे म्हणून त्यांची भूमिका राज्यातील मराठा समाजाला पटू लागली.

१७ दिवस चाललेल्या त्यांच्या उपोषणानंतर शासनाने एक महिन्याची मुदत मागून घेतली. त्यानंतर मुख्यमंत्री एकनाथ शिंदे यांच्या हस्ते त्यांनी उपोषण सोडले; परंतु आंदोलन सुरू राहणार, अशी भूमिका घेतली. त्यानंतर त्यांनी राज्याचा दौरा सुरू केला. त्याची कणखर भूमिका पटत असल्यामुळे त्यांच्या दौऱ्यांना प्रत्येक ठिकाणी उत्स्फूर्त प्रतिसाद मिळत आहे. अगदी पहाटे तीनला जरी सभा झाली, तरी हजारो मराठा बांधव तेथे ठाण मांडून बसत होते.