खंडाळ्याला लशीचा पुरेसा साठा द्या; पंचायत समितीत 'ठराव'

लोणंद (सातारा) : खंडाळा तालुक्यात ६० टक्के कोविडचे लसीकरण (Covid Vaccination) झाले आहे. लशीच्या पुरेशा उपलब्धतेअभावी दोन-दोन दिवस लसीकरण थांबवावे लागत आहे. त्यामुळे लसीकरणाचा वेग धिम्या गतीने सुरू आहे. तालुक्यातील लसीकरणाचा वेग वाढण्यासाठी जिल्हाधिकारी शेखर सिंह (Collector Shekhar Singh) यांनी पुरेशा प्रमाणात लशीचा साठा उपलब्ध करावा, अशी मागणी करून तसा ठराव खंडाळा पंचायत समितीच्या (Khandala Panchayat committee) मासिक बैठकीत करण्यात आला.

माणदेशी फाउंडेशनने लोणंद येथे तालुक्यातील महिलांसाठी दोन दिवस कोविड लसीकरण शिबिर आयोजित करून तालुक्यातील २ हजार ५२५ महिलांचे लसीकरण केले. त्याबद्दल माणदेशी फाउंडेशन व माणदेशीच्या संस्थापिका श्रीमती चेतना सिन्हा यांचे अभिनंदन करून तसा अभिनंदनाचा ठरावही बैठकीत करण्यात आला. सभापती राजेंद्र तांबे यांच्या अध्यक्षतेखाली आज मासिक बैठक झाली. या वेळी उपसभापती वंदनाताई धायगुडे- पाटील, सदस्य चंद्रकांत यादव, अश्विनीताई पवार उपस्थित होते. सदस्य मकरंद मोटे व शोभाताई जाधव हे बैठकीला अनुपस्थित होते. गटविकास अधिकारी माणिकराव बिचुकले यांनी मागील बैठकीचे इतिवृत्त वाचून कायम करून चालू सभेपुढील विषयांचे वाचन केले. या वेळी खातेनिहाय कामांचा आढावा घेण्यात आला. एसटी महामंडळाच्या पारगाव- खंडाळा आगाराच्या वतीने विविध मार्गांवर लांब पल्ल्याच्या १८ बस सुरू केल्या आहेत. मात्र, ग्रामीण भागात अद्यापही एकही एसटी बस सुरू केली नाही. त्यामुळे ग्रामीण भागातील नागरिकांचे मोठे हाल होत आहेत.

ग्रामीण भागातही पूर्वीप्रमाणे एसटी बसच्या फेऱ्या सुरू करण्याची मागणी बैठकीत सदस्यांनी केली. सभापती तांबे यांनी खंडाळा- तुळजापूर ही एसटी बस शिरवळमार्गे नेण्यात यावी, असे सांगितले. ग्रामीण भागातही पूर्वीप्रमाणे एसटीच्या फेऱ्या सुरू करण्यात येतील. डिझेलच्या अपुऱ्या पुरवठ्यामुळेही अनेक अडचणी येत असल्याचेही संबंधित अधिकारी यांनी सांगितले. चाचण्यांच्या प्रमाणात केवळ दोन टक्के रुग्ण सापडत असल्याची माहिती तालुका वैद्यकीय अधिकारी डॉ. अविनाश पाटील यांनी बैठकीत दिली. उपसभापती वंदनाताई धायगुडे यांनी आभार मानले.