पालकमंत्री मध्यरात्री थेट पोलिस ठाण्यात; विराटच्या कुटुंबाला 'आधार'

कऱ्हाड (सातारा) : येथील धवार पेठेत नगरपालिकेने (Karad Municipality) खोदलेल्या खड्ड्यात चार वर्षांचा चिमुरड्याचा मृत्यू झाला. त्यानंतर बुधवार पेठेत तणाव होता. विराटच्या नातेवाइकांनी मध्यरात्री पोलिस ठाण्यात ठिय्या मांडला. त्या वेळी मुंबईहून कऱ्हाडला येत असलेल्या पालकमंत्री बाळासाहेब पाटील (Balasaheb Patil) हे मध्यरात्री दीडच्या सुमारास थेट कऱ्हाड शहर पोलिस ठाण्यात (Karad City Police Station) आले. तेथे विराटच्या कुटुंबांची भेट घेऊन त्यांचे सांत्वन केले. तपासाच्या सूचना केल्या. पालकमंत्र्यांनी दाखवलेल्या प्रसंगावधानाने स्थिती नियंत्रणात येण्यास मदत झाली.

मुंबईला मंत्रिमंडळाची बैठक संपवून पालकमंत्री पाटील कऱ्हाडकडे येत होते. त्या वेळी विराट विजय चव्हाण याच्या दुर्दैवी मृत्यूची बातमी समजली. ते शिरवळपर्यंत होते. साताऱ्यापर्यंत येईपर्यंत त्यांनी पोलिस निरीक्षक बी. आर. पाटील यांना फोन लावून माहिती घेतली. त्यानंतर पालकमंत्री थेट कऱ्हाड शहर पोलिस ठाण्यात आले. त्यांनी विराटच्या आई- वडिलांसह अन्य नातेवाइकांची भेट घेऊन सांत्वन केले. संतप्त नागरिकांशीही त्यांनी संवाद साधला. नागरिकांनाही शांत करत पोलिस योग्य कारवाई करतील, असे आश्वासित केले.

लोकशाहीचे गट नेते सौरभ पाटील, अख्तर आंबेकरी, जयंत बेडेकर, दक्ष कऱ्हाडकर ग्रुपचे प्रमोद पाटील, माजी नगरसेवक आनंदराव लादे उपस्थित होते. त्यांच्याशीही चर्चा करून पालकमंत्र्यांनी पोलिसांशी स्वतंत्रपणे संवाद साधला. पोलिस उपअधीक्षक रणजित पाटील, बी. आर. पाटील, सहायक पोलिस निरीक्षक विजय गोडसे, अमित बाबर उपस्थित होते. पालकमंत्र्यांनी ठिय्या मांडलेल्या विराटच्या आप्तेष्टांसह नातेवाईकांशी चर्चा केली. पोलिस कारवाईची माहिती देत नागरिकांना शांत राहण्याचे आवाहन त्यांनी केले. त्यानंतर विराटच्या नातेवाइकांनी मृतदेह ताब्यात घेण्याची कबुली दिली. तब्बल दीड तास पालकमंत्री पाटील यांनी पोलिस ठाण्यात थांबून परिस्थिती हाताळली.