Sanjay Raut : 'पाटणचं नाव महाराष्ट्रात बदनाम झालंय, गद्दारीमुळं त्यांना तोंडवर करून चालायची लाज वाटतेय'

मल्हारपेठ : जसा खोक्याचा भूकंप झाला, तसे पाटण हे भूकंपांचे केंद्र आहे. महाराष्ट्रात कुठेही भूकंप झाला तरी पाटणला केंद्रबिंदू शोधतात. अनेक धक्के पचवून हा तालुका उभा राहिला आहे.

त्यामुळे येथील जनतेला अशा धक्क्यांचं काही वाटत नाही, त्यातूनही हा तालुका उभा राहतो. हा कसला धक्का मुंबईला भाऊचा धक्का बरा, असा टोला शंभूराज देसाई (Shambhuraj Desai) यांचे नाव न घेता खासदार संजय राऊत यांनी लगावला. मल्हारपेठ येथे विविध विकासकामांच्‍या उद्‌घाटनप्रसंगी ते बोलत होते.

यावेळी शिवसेना उद्धव बाळासाहेब ठाकरे नेते व खासदार संजय राऊत यांची प्रमुख उपस्थिती होती. पश्चिम महाराष्ट्र संपर्क प्रमुख नितीन बानुगडे- पाटील सातारा, जिल्हा बँकेचे संचालक सत्यजितसिंह पाटणकर, राष्‍ट्रवादी आयटी सेलचे प्रदेशाध्यक्ष सारंग पाटील, शिवसेना (ठाकरे गट) जिल्हाप्रमुख भानुप्रताप (हर्षद) कदम, मल्हारपेठच्‍या सरपंच धनश्री कदम आदी उपस्थित होते.

खासदार राऊत म्हणाले, मला पाटण तालुक्यात यायचेच होते; पण याअगोदर असणाऱ्या लोकप्रतिनिधींनी शिवसेनेच्या कुठल्याही कार्यक्रमाला बोलावले नाही. सध्या ते मालक-पालक-चालक तेच आहेत तर महाराष्ट्रात बाळासाहेब देसाई यांची ओळख लोकनेते म्हणून आहे, होती आणि राहणार आहे.

बाळासाहेब ठाकरे यांच्याबरोबर त्यांचा अतिशय जवळचा घरोब्याचा संबंध होता. शिवसेनेच्या स्थापनेपासून बाळासाहेब देसाई हे शिवसेनेच्या पाठीशी खंबीरपणे उभे राहिलेले नेते होते. काँग्रेसचे नेते असले तरी लोकनेते होते. मात्र, त्यांच्या नातवाला कधीही लोकनेता होता येणार नाही, हे फेक नेते आहेत.

यावेळी सत्यजितसिंह पाटणकर म्हणाले, की पाटण तालुक्याचा विकास करायचा असला तर दूरदृष्टी व सकारात्मक विचार असणाऱ्या लोकांकडे ही सत्ता गेली पाहिजे. आज पाटणचे नाव महाराष्ट्रात बदनाम झाले आहे. एका बाजूला ५० खोके, गद्दारी, टक्केवारी यामुळे बाहेर फिरताना वर तोंड करून चालायची लाज वाटते; कारण गद्दारीचे मूळ हे या पाटणमधूनच सुरू झाले आहे.

हर्षद कदम म्हणाले, महाविकास आघाडीच्या माध्यमातून ग्रामपंचायत ताब्यात घेतल्यानंतर आम्ही विकासाच्या कामांना महत्त्व दिले. दादासाहेब पानस्कर यांनी प्रास्‍ताविक केले तर तालुकाप्रमुख सुरेश पाटील यांनी आभार मानले.