निवडणुकीवर 'पैसा' खर्च करण्यापेक्षा निवडणुका 'बिनविरोध' करा

सातारा : जिल्हा बॅंकेच्या निवडणुका (Satara Bank Election) जाहीर होताच जिल्ह्यात राजकीय चर्चांना उधाण आले असून उमेदवारांची चाचपणी करण्यासाठी नेत्यांकडून लगबग सुरु आहे. दरम्यान, निवडणुकीबाबत जिल्हा बँकेचे संचालक व खासदार उदयनराजे भोसले (MP Udayanraje Bhosale) यांनीही आपली भूमिका मांडली असून ते म्हणाले, की निवडणूक लावून खर्च करण्यापेक्षा निवडणुकीचा पैसा शेतकरी सभासदांसाठी वापरला तर त्यांना चांगला फायदा होईल, तसेच बँक व्यवस्थित चाललेली असताना बँकेला 'ईडी' नोटीस (ED Notice) का पाठविण्यात आली?, असा सवालही त्यांनी यावेळी उपस्थित केला.

साताऱ्याचे भाजपचे खासदार उदयनराजे भोसले यांनी आज अचानक जिल्हा मध्यवर्ती बँकेच्या वार्षिक सर्वसाधारण सभेआधी बँकेच्या मुख्य कार्यालयात उपस्थिती लावली. जिल्हा मध्यवर्ती सहकारी बँकेची निवडणूक लागली असून त्या अनुषंगाने त्यांना पत्रकारांनी विचारले असता, त्यांनी बँकेच्या कामकाजावर समाधान व्यक्त केले. तसेच बँकची निवडणूक बिनविरोध करण्याची मागणी केली आहे.

उदयनराजे म्हणाले, जिल्हा मध्यवर्ती बँकेच्या निवडणुकीशी माझा काही संबंध नाही. पण, बँकेची निवडणूक लावून खर्च करण्यापेक्षा निवडणुकीचा पैसा सभासदांसाठी वापरला तर सभासदांचा फायदा होईल, असेही त्यांनी पत्रकारांशी बोलताना सांगितले. तसेच बँक व्यवस्थित चालली असताना बँकेला 'ईडी'ची नोटीस का पाठविण्यात आली, असा मुद्दाही त्यांनी यावेळी उपस्थित केला.