उद्या गडावर जाऊन, कोणीही फाईव्हस्टार हॉटेल बांधेल; विशाळगडावरुन उदयनराजेंचा अतिक्रमणधारकांना स्पष्ट इशारा

कऱ्हाड : विशाळगडासंदर्भात (Vishalgad Controversy) काय घडले, काय घडले नाही यापेक्षा छत्रपती शिवाजी महाराजांचे (Chhatrapati Shivaji Maharaj) जेवढे गड-किल्ले आहेत तेथे अतिक्रमण होता कामा नये, असे स्पष्ट मत खासदार उदयनराजे भोसले (Udayanraje Bhosale) यांनी येथे व्यक्त केले. त्‍याचबरोबर अतिक्रमण करणाऱ्यांची कानउघाडणीही केली.

कऱ्हाडमधील पाणीपुरवठ्याच्या कामाचा आढावा घेण्यासाठी खासदार भोसले येथे आले होते. त्यादरम्यान त्यांनी पत्रकारांशी संवाद साधला. माजी आमदार आनंदराव पाटील, माजी ज्येष्ठ नगरसेवक विनायक पावसकर, पालिकचे माजी उपाध्यक्ष राजेंद्र यादव, सुनील काटकर, माजी नगरसेवक विजय वाटेगावकर, हणमंत पवार, स्मिता हुलवान, विजय यादव, मुकुंद चरेगावकर यांच्यासह पदाधिकारी उपस्थित होते.

खासदार भोसले म्हणाले, ‘‘विशाळगडासंदर्भात काय घडले, काय घडले नाही यापेक्षा छत्रपती शिवाजी महाराजांचे जेवढे गड-किल्ले आहेत तेथे अतिक्रमण होता कामा नये. वर्षानुवर्षे गडावर जे गडकरी आहेत, त्यांची घरे सोडली तर कोणीही तेथे अतिक्रमण करू नये. उद्या गडावर जाऊन, कोणीही फाईव्हस्टार हॉटेल बांधेल. त्यामुळे त्याचे पावित्र्य राहात नाही.’’

गड- किल्ले हे सर्व पुरातत्त्व खात्याच्या अंतर्गत येतात. पुरातत्त्व खाते हे अवैध बांधकामाला परवानगी देणार नाही. मात्र, जे गडावर राहणारे गडकरी आहेत ते सोडले तर बाकींच्याचा गडावर अतिक्रमण करण्याचा अधिकारच काय? त्यांनी तेथे अतिक्रमण करूच नये, असे स्पष्ट मत त्यांनी व्यक्त करून अतिक्रमण करणाऱ्यांची कानउघाडणी केली आहे.