इनोव्हेटिव्ह साताराविषयी खासदार उदयनराजेंच्‍या सूचना

सातारा - वाढे फाटा चौक, बॉम्बे रेस्टॉरंट चौक, अजंठा चौक, शिवराज चौक शहराची प्रवेशद्वारे आहे. ठिकाणच्या उड्डाणपुलाखालील राष्ट्रीय महामार्गाच्या (National Highway) जागेत महानगरांच्‍या धर्तीवर, बागबगीचा, वॉकिंग ट्रॅक, व्हर्टिकल गार्डन, भाजी मंडई, पार्किंग, आर्टिफिशियल वॉटरफॉल, फाउंटन्स्, सार्वजनिक स्वच्छतागृह आदी सुविधा सुरू करण्याचा प्रयत्न इनोव्हेटिव्ह साताराच्या (Innovative Satara) माध्यमातून सुरू आहे. हा भाग पालिकेत आल्‍याने पालिकेने भविष्यकालीन विचार करून पुढाकार घेत तसे प्रस्‍ताव शासनाकडे देण्‍याच्‍या सूचना सातारा विकास आघाडीचे अध्यक्ष खासदार श्रीमंत छत्रपती उदयनराजे भोसले (Udayanraje Bhosale) यांनी दिल्या.

इनोव्हेटिव्ह साताराविषयी जलमंदिर येथे आज झालेल्‍या आढावा बैठकीत उदयनराजे बोलत होते. अजंठा चौक, बॉम्बे रेस्टॉरंट आणि वाढे फाटा चौक येथील उड्डाण पुलाखाली मोठी जागा उपलब्ध आहे. या जागेमध्ये कोणतेही अवैध उद्योग होऊ नयेत आणि जागेचा सुयोग्य वापर लोकोपयोगी कामामध्ये होण्यासाठी आम्ही राष्ट्रीय महामार्ग प्राधिकरणास यापूर्वी वेळोवेळी विविध प्रस्ताव सुचविलेले आहेत. तथापि, या पुलाखालील जागा हस्तांतरणास तयार असल्‍याचे महामार्ग प्राधिकरणाने कळवले आहे. हा भाग पालिकेत आला असून, येथे चांगले उपक्रम राबविणे आवश्‍‍यक आहे. त्यासाठी आर्किटेक्ट असोसिएशनकडून प्रकल्प चित्र तयार करून घेण्‍याच्‍या सूचनाही उदयनराजेंनी दिल्‍या. शहरानजीकच्‍या महामार्गांच्या पुलांची स्वच्छता, सर्व्हिस रोडवरील गटार स्वच्छता आणि साफसफाई आणि स्ट्रीट लाइट तातडीने सुरू करण्याच्या सूचना महामार्ग प्राधिकरणाला केल्‍याचेही त्‍यांनी या वेळी स्‍पष्‍ट केले.