Prashant Damle: नाट्य परिषदेचे अध्यक्ष प्रशांत दामले यांनी पालकांना काय केले आवाहन? वाचा महत्वाची बातमी

karhad News | मराठीमध्ये हलक्या फुलक्या विषयांची दर्जेदार नाटक तयार होत आहेत. भविष्यातील जाणकार प्रेक्षक तयार होण्यासाठी व नाटकाकडे तरुण पिढी येण्यासाठी त्यांच्या आई वडिलांनी त्यांना आवर्जून नाटक पहायला आणले पाहिजे. तरच तरुणांना नाटक म्हणजे काय हे समजून त्यांचा नाटकाकडे कल वाढेल, असे मत प्रसिद्ध अभिनेते प्रशांत दामले यांनी आज येथे व्यक्त केले.

दै. सकाळ च्यावतीने कऱ्हाड (जि.सातारा) येथे आयोजित करण्यात आलेल्या नाट्य महोत्सवाच्या पार्श्वभूमीवर हॉटेल अलंकारमध्ये आयोजित कॉफी विथ कलाकार यामध्ये अभिनेते दामले बोलत होते. अभिनेते विनय येडेकर, सकाळचे व्यवस्थापक राजेश निंबाळकर, चितळे डेअरीचे शरद कुलकर्णी, शिवसमर्थ मल्टीस्टेट क्रेडीट को.ऑप सोसायटीचे संदिप डाकवे, बचपन स्कुलचे संजय जाधव, रोहन जाधव, हॉटेल अलंकारचे जयदीप अरबुणे, आदी उपस्थित होते.

नाट्य परिषदेच्या माध्यमातून नाट्य जागर ही स्पर्धा पूर्ण महाराष्ट्रात घेतली, असे सांगून श्री. दामले म्हणाले, त्यामध्ये राज्यातील १५ ते १६ हजार कलावंतांनी भाग घेतला. त्या माध्यमातून नाट्य चळवळीसंदर्भात हालचाल सुरू झाली. त्यानंतर एकांकिका स्पर्धा घेतल्या. त्या माध्यमातून रस निर्माण करण्याचे काम सुरू आहे. सध्या शुन्यापासून सुरू करत आहोत. त्याला यश येत आहे. मुंबईमध्ये नवीन कलाकार येत आहेत. त्यांना सोयी सुविधा देण्यासह त्यांना राहण्याची सोय अल्प दरात करण्याची योजना हाती घेत आहोत. त्याचबरोबर राज्यभरातील नाट्यगृहांची अवस्था सुधारली पाहिजे यासाठी पाठपुरावा करत आहोत.

चित्रपटाचे दोन दोन वर्षे शुटींग चालते. मात्र नाटकाचा अडीच तासात फैसला होतो, असे सांगून अभिनेते विनय येडेकर म्हणाले, नाटक म्हणजे कुटुंबाचा उत्सवच असतो. अभिनय करताना नाटकामध्ये थेट तो करावा लागतो. त्यामुळे पालकांनी मुलांना वाचण्यासाठी चांगली पुस्तके देण्यासोबत नाट्य चळवळ वाढीसाठी मुलांना आवर्जून नाटके पाहण्यासाठी आणले पाहिजे.

----------------------

राज्यकर्त्यांची सढळ हाताने मदत

लोकसभेची निवडणूक होण्याअगोदर राज्य शासनाकडून ही चळवळ वाढण्यासाठी मदत झाली. अर्थसंकल्पात ८५० कोटींचा निधी मंजूर करून घेतला आहे. मुख्यमंत्री, दोन्ही उपमुख्यमंत्री, सांस्कृतिक कार्यमंत्री, विश्वस्त उदय सामंत, ज्येष्ठ नेते शरद पवार हे वेगवेगळ्या पक्षाचे असले तरी नाटकांवर त्यांचे प्रेम आहे. ते सढळ हाताने मदत करतात. जो कलाकार रंगभूमीवर टिकून काम करेल तोच टिकेल. मराठी नाटकांसाठी कलाकारांनी वेळ द्यावा तरच ही नाट्यचळवळ पुढे जाईल.

----------------

सकाळने दिले नाट्य चळवळीला बळ

सकाळचा नाट्य महोत्सव असला की तो यशश्वी होतोच, असे सांगून श्री. दामले म्हणाले, वृत्तपत्र चालविण्याबरोबरच दै. सकाळने नाट्य महोत्सव आयोजित करून नाट्य चळवळीला बळ दिले आहे. पश्चिम महाराष्ट्रात कऱ्हाडला पहिलाच सकाळ तर्फे नाट्य महोत्सव आयोजित करण्यात आला आहे. इतर सर्व दैनिक सकाळला फॉलो करायला लागले आहेत. त्यामुळे महाराष्ट्रात नाकटाबाबत आशादायी चित्र निर्माण होत आहे.

----------------------

प्रेक्षकांसाठी आजपर्वणी

दै. सकाळच्या वतीने आयोजित करण्यात आलेल्या नाट्य महोत्सवात उद्या (शनिवार) संकर्षण कऱ्हाडे यांचे नियम व अटी लागू हे नाटक नाट्य रसिकांना पाहण्याची संधी उपलब्ध होणार आहे. येथील यशवंतराव चव्हाण स्मृतिसदनात सायंकाळी सात वाजता या नाटकांचे सादरीकरण होणार आहे.