रुग्णांच्या जिवाशी खेळ! दारूच्या नशेत डॉक्टरकडून उपचार, ग्रामीण रुग्णालयातील धक्कादायक प्रकार उघड

पिंपोडे बुद्रुक : येथील ग्रामीण रुग्णालयात मद्यप्राशन केलेला डॉक्टर (Doctor) नशेत रुग्णांवर उपचार करत असल्याचा धक्कादायक प्रकार उघडकीस आला आहे. जागृत नागरिकांनी या डॉक्टरला वैद्यकीय तपासणीसाठी वाठार पोलिसांच्या ताब्यात दिले असून, जिल्हा शल्यचिकित्सकांनी त्याच्यावर कारवाई करावी, अशी मागणी होत आहे.

डॉ. अरुण जाधव असे संबंधित डॉक्टरचे नाव आहे. याबाबत घटनास्थळावरून मिळालेली माहिती अशी, की येथील ग्रामीण रुग्णालयात (गुरुवार) रात्री आठ वाजता राऊतवाडी व वाघोलीचे रुग्ण उपचारासाठी आले होते. ड्यूटीवर असणारे डॉ. अरुण जाधव यांनी मद्यप्राशन केल्याची शंका एका रुग्णाला आली.

त्यानंतर रुग्णाने उपचारास नकार देत ग्रामस्थांना हा विषय सांगितला. ही माहिती समजताच रुग्णालयात तरुण जमा झाले. यावेळी रुग्णालयात उभ्या असलेल्या डॉक्टरच्या मोटारीमध्ये ग्लास व दारूच्या (liquor) रिकाम्या बाटल्या सापडल्या. याबाबत वाठार पोलिसांना (Vathar Police) कळवण्यात आले.

पोलिसांनी मद्यपी डॉक्टरला वैद्यकीय तपासणीसाठी पाठवले असता त्याने मद्यपान केल्याचे आढळून आले. त्यामुळे नागरिकांमधून संताप व्यक्त होत आहे. मद्यप्राशन करून रुग्णांच्या जिवाशी खेळणाऱ्या डॉक्टरवर जिल्हा शल्यचिकित्सकांनी त्वरित कारवाई करावी, अशी नागरिकांची मागणी आहे.

पिंपोडे ग्रामीण रुग्णालयाच्या वैद्यकीय अधीक्षकांना या प्रकाराची चौकशी करण्याचे आदेश दिले आहेत. चौकशी अहवालानंतर कारवाईबाबत वरिष्ठांकडे प्रस्ताव पाठविण्यात येईल.

-डॉ. युवराज करपे, जिल्हा शल्यचिकित्सक