Pusesawali Riots : मुस्लिम संघटनांच्या मूक मोर्चाला प्रशासनाचा नकार; पुसेसावळी दंगलीच्या पार्श्वभूमीवर पोलिसांसमोर आव्हान

सातारा : पुसेसावळी येथील (Pusesawali Riots) घटनेच्या निषेधार्थ साताऱ्यातील मुस्लिम संघटनेसह (Muslim Organizations) विविध सामाजिक संघटनांनी शनिवारी मूक मोर्चा काढण्याचा इशारा दिला होता. या अनुषंगाने गुरुवारी सायंकाळी जिल्हाधिकारी कार्यालयात झालेल्या बैठकीत प्रशासनाने या मूक मोर्चास नकार दिला आहे.

तर, संघटना आपल्या भूमिकेवर ठाम राहिल्याने मोर्चाचा तिढा कायम राहिला आहे. सातारा शहरात शनिवार (ता. १६) सकाळी ११ वाजता मूक मोर्चा व शांतता फेरी काढण्याची परवानगी मिळावी, यासाठी गेल्या चार दिवसांपासून खल सुरू आहे. याबाबत विविध संघटना पोलिस अधीक्षक समीर शेख यांना भेटण्यासाठी गुरुवारी एकत्र आले.

त्यावेळी हा मोर्चा स्थगित झाल्याचे काही संघटनांच्या प्रतिनिधीकडून सांगण्यात येत होते. या स्थगित झालेल्या मोर्चाबाबत विविध संघटनांच्या वतीने सायंकाळी पाच वाजता निवेदन देण्याचे ठरले होते. मात्र, दुपारनंतर संघटनांच्या प्रतिनिधींमध्ये एकमत न झाल्याने संघटनांची बैठक जिल्हाधिकारी कार्यालयात घेण्याचे ठरले.

त्यानुसार रात्री उशिरापर्यंत बैठक झाली; पण प्रशासन मोर्चा काढू नये, याच भूमिकेवर ठाम होते, तर संघटना मूक मोर्चा काढणारच, या भूमिकेवर ठाम राहिल्याने या मोर्चाबाबतचा तिढा कायमच राहिला आहे. याबाबत शुक्रवारी दुपारपर्यंत निर्णय होणे अपेक्षित आहे.