Rain Update : कोयना धरण क्षेत्रात सलग चौथ्या दिवशी पावसाचा जोर कमी; महाबळेश्वरला सर्वात कमी पावसाची नोंद

पाटण : कोयना धरण (Koyna Dam) पाणलोट क्षेत्रासह तालुक्यात सलग चौथ्या दिवशी पावसाचा (Rain Update) जोर कमी झाला आहे. पश्चिम भागात थोड्या प्रमाणात पाऊस पडत असला, तरी पूर्वेकडे मात्र गेली तीन दिवस पावसाने पूर्ण उघडीप घेतली आहे.

दिवसभरात एक किंवा दुसरी रिमझिम पावसाची सर येते एवढाच शेतकरी वर्गाला दिलासा मिळतोय. गेल्या २४ तासांत कोयना धरण पाणलोट क्षेत्रातील कोयनानगर येथे ३२ मिलिमीटर, नवजाला ३५ मिलिमीटर आणि महाबळेश्वरला (Mahabaleshwar) सर्वात कमी १६ मिलिमीटर पावसाची नोंद झाली आहे.

जलाशयात प्रतिसेकंद चार हजार दहा क्युसेक पाण्याची आवक होत असून, एकूण पाणीसाठा २३.६९ टीएमसी झाला आहे. दरम्यान, पावसाने पूर्णपणे उघडीप घेतल्याने शेतकरी वर्गामध्ये चिंता व्यक्त केली जात आहे.