दहिवडीत अंधश्रद्धेतून मुलीचा बळी?; माण तालुक्यातील दोन देवऋषींना पोलिस कोठडी

दहिवडी (जि. सातारा) : अंधश्रद्धेतून मुलीच्या बळी प्रकरणातील संशयित दोन्ही देवऋषींना दहिवडी पोलिसांनी काल ताब्यात घेऊन न्यायालयासमोर हजर केले असता न्यायाधीशांनी दोघांनाही दोन मार्चपर्यंत पोलिस कोठडीत ठेवण्याचे आदेश दिले. मुलीच्या कुटुंबीयांचा शोध घेण्यात पोलिसांना यश आले असून, अधिक तपास सुरू आहे. 

दोन कथित "देवऋषीं'च्या भूत लागल्याच्या सल्ल्याला भुलून पालकांनी योग्य वैद्यकीय उपचार न केल्यामुळे चौदा वर्षीय मुलीचा हकनाक बळी गेल्याची बातमी शुक्रवारी प्रसिद्ध झाल्यानंतर सर्वत्र खळबळ माजली होती. काल या घटनेची माहिती मिळताच सहायक पोलिस निरीक्षक राजकुमार भुजबळ यांनी वेगाने हालचाली करून उत्तम अवघडे (गोंदवले, ता. माण) व रामचंद्र सावंत (मोही, ता. माण) हे दोन्ही देवऋषी ताब्यात घेतले. मृत मुलीच्या कुटुंबीयांना शोधण्यासाठी पोलिस पथक पाठवले. या पथकाने कुटुंबीयांना मायणी (ता. खटाव) येथून ताब्यात घेऊन दहिवडी येथे आणले. 

ज्याच्यात हिम्मत असेल, त्याने पुढे यावे; शिवपुतळ्यावरुन उदयनराजेंचे प्रशासनाला थेट आव्हान

दरम्यान, या घटनेबद्दल सुनील काटकर (रा. दहिवडी) यांनी पोलिस ठाण्यात तक्रार दाखल केली. तक्रारीत म्हटले आहे, की मुलीचा चुलत मामा निखिल बुरुंगले याच्याकडून बायली इंगवले हिच्या मृत्यूबाबत मिळालेल्या माहितीवरून झालेला प्रकार गंभीर असून, या विरोधात दाद मागणे आवश्‍यक असल्याचे श्री. काटकर यांनी श्री. बुरुंगले यांना सांगितले. श्री. काटकर यांनी त्यांचे मित्र सातारा येथील अंनिसचे प्रशांत पोतदार यांच्याशी संपर्क साधून सर्व घटना सांगितली. श्री. पोतदार यांनी एखाद्या व्यक्तीला शारीरिक इजा होण्यास भूताचा किंवा अतिंद्रिय शक्तीचा कोप असल्याचा समज करून देणे आणि तिला वैद्यकीय उपचार घेण्यापासून रोखून त्याऐवजी तिला अमानुष, अनिष्ट व अघोरी कृत्य व उपाय करण्यास प्रवृत्त करणे हा गंभीर अपराध आहे, असे सांगितले. 

खळबळजनक घटना: आई वडिलांनी मुलीचा मृतदेह परस्पर पुरला

त्यानुसार श्री. काटकर यांनी शुक्रवारी दोन्ही देवऋषीविरुद्ध दहिवडी पोलिस ठाण्यात तक्रार दाखल केली आहे. या तक्रारीवरून दोन देवऋषींच्या विरोधात महाराष्ट्र नरबळी व इतर अमानुष, अनिष्ट व अघोरी प्रथा व जादूटोणा यांना प्रतिबंध करण्याबाबत व त्यांचे समूळ उच्चाटन करण्याबाबत अधिनियम या कायद्यानुसार गुन्हा दाखल करण्यात आला आहे. मुलीच्या कुटुंबीयांकडून माहिती घेण्याचा प्रयत्न सुरू आहे, तसेच घटनास्थळाचा आज पंचनामा करण्यात आला. या घटनेमागे आणखी काही कारणे आहेत का, याचा शोध पोलिस घेत आहेत. या घटनेचा अधिक तपास सहायक पोलिस निरीक्षक राजकुमार भुजबळ करत आहेत. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे