गणेशोत्सव साध्या पद्धतीने साजरा करा! जिल्हाधिकारी शेखर सिंह

सातारा: कोरोनाच्‍या पार्श्वभूमीवर यंदाचा गणेशोत्सव जिल्ह्यात साध्या पद्धतीने व पर्यावरण पूरक साजरा करण्‍याचे आवाहन जिल्हाधिकारी शेखर सिंह यांनी केले. जिल्हाधिकारी कार्यालयात त्‍यांच्‍या अध्‍यक्षतेखाली गणेशोत्सवाबाबत बैठक आयोजित करण्‍यात आली होती. या बैठकीत ते बोलत होते. बैठकीस पोलिस अधीक्षक अजयकुमार बन्सल यांच्यासह विविध विभागांचे अधिकारी उपस्थित होते.

जिल्हाधिकारी सिंह म्‍हणाले, ‘‘यंदाच्‍या गणेशोत्‍सवात सार्वजनिक गणेश मंडळांची मूर्ती चार फूट उंचीची व घरगुती गणेशमूर्ती दोन फूट उंचीची असावी. नागरिकांनी, तसेच मंडळांनी पारंपरिक गणेशमूर्ती स्‍थापन्याऐवजी घरातील धातू, संगमरवराच्‍या मूर्तींचे पूजन करावे. मूर्ती पर्यावरणपूरक असल्यास त्याचे विसर्जन शक्यतो नागरिकांनी घरीच करावे. तसे विसर्जन घरी शक्य नसल्यास जवळच्‍या कृत्रिम विसर्जनस्थळी त्‍या मूर्तीचे विसर्जन करावे.’’

जाहिराती, देखाव्‍यांमुळे गर्दी होणार नाही, याची काळजी मंडळांनी घ्‍यायची असून, मंडळांनी शक्‍यतो आरोग्य विषयक व सामाजिक संदेश असलेल्या जाहिराती प्रदर्शित करण्यावर भर देणे आवश्‍‍यक आहे. मंडळांनी सांस्कृतिक कार्यक्रम टाळत आरोग्य विषयक उपक्रम, शिबिरे आयोजित करावीत, तसेच इतर कारणासाठी मंडळात होणारी गर्दी टाळण्‍याचे आवाहनही श्री. सिंह यांनी बैठकीत केले. गणेशोत्सवात ध्वनी प्रदूषणासंदर्भातील नियमांचे व तरतुदींचे काटेकोरपणे पालन करावे, असे त्यांनी सांगितले.

गणेश दर्शनाची सुविधा ऑनलाइन, केबल नेटवर्क, वेबसाइट व फेसबुक आदी समाजमाध्‍यमांद्वारे उपलब्‍ध करून द्यावे.

- शेखर सिंह, जिल्हाधिकारी.