निवडणुकीत मतदारांनी माझ्यावर विश्वास दाखवून मला निवडून आणले; रांजणे

केळघर : सातारा जिल्हा मध्यवर्ती सहकारी बँकेच्या निवडणुकीत मतदारांनी माझ्यावर विश्वास दाखवून मला निवडून आणले आहे. या विश्वासाला पात्र राहून जावळी तालुक्यातील विकास सेवा सोसायट्यांना आर्थिकदृष्ट्या सक्षम करून जिल्हा बँकेच्या लोकोपयोगी योजना शेतकऱ्यांपर्यंत पोचवण्यासाठी प्रयत्न करू, अशी ग्वाही जिल्हा बँकेचे संचालक ज्ञानदेव रांजणे यांनी दिली.

जिल्हा मध्यवर्ती बँकेच्या संचालकपदी निवड झाल्याबद्दल रांजणे यांचा काळेश्वरी वरोशी विकास सेवा सोसायटीच्या वतीने केळघर येथील सोसायटीच्या कार्यालयात नुकताच सत्कार करण्यात आला, त्यावेळी ते बोलत होते. यावेळी पंचायत समिती सदस्य विजय सुतार, ज्येष्ठ नेते मोहनराव कासुर्डे, केळघर सोसायटीचे अध्यक्ष बबन बेलोशे, सोसायटी संचालक हरिभाऊ शेलार, बंडोपंत ओंबळे, कोंडीबा कासुर्डे, सुरेश कासुर्डे, बाजीराव कासुर्डे, दिलीप पाटील, सरपंच विलास शिर्के, शिवराम गोळे अंकुश बेलोशे, चंद्रकांत ओंबळे, प्रकाश ओंबळे, शिवराम बेलोशे, संतोष कासुर्डे आदींची उपस्थिती होती.

रांजणे म्हणाले, जावळी तालुका हा दुर्गम व डोंगराळ तालुका आहे. या तालुक्यातील शेतकऱ्यांना जिल्हा बँकेच्या योजनांचा लाभ मिळवून दिला जाईल. आमदार शिवेंद्रसिंहराजे भोसले यांच्या मार्गदर्शनाखाली तालुक्यात सहकाराचे नाव अग्रेसर होण्यासाठी प्रयत्न केले जातील. विकास सेवा सोसायट्या ह्या ग्रामीण भागातील अर्थकारण चालवतात. या सोसायट्या अधिक सक्षम करण्यासाठी जिल्हा बँकेच्या माध्यमातून प्रयत्न करू. केळघर विभागाला जिल्हा बँकेच्या माध्यमातून संधी मिळाली आहे. त्या संधीचे सोने करण्यासाठी शेवटच्या क्षणापर्यंत काम करत राहू.

मोहनराव कासुर्डे म्हणाले, संघर्षातून रांजणे यांनी हा विजय मिळवून इतिहास निर्माण केला आहे. तालुक्यातील सहकार चळवळीला त्यांनी उभारी देऊन विकास सेवा सोसायट्यांच्या प्रगतीसाठी जिल्हा बँकेचे संचालक म्हणून रांजणे यांनी काम करावे. प्रारंभी वरोशी विकास सेवा सोसायटीच्या वतीने रांजणे यांचा सत्कार करण्यात आला. कार्यक्रमास वरोशी सोसायटीचे संचालक,सभासद उपस्थित होते.विलास शिर्के यांनी आभार मानले.