गावाच्या सर्वांगीण विकासासाठी प्रयत्न करेन : आशालता गायकवाड

सायगाव (जि. सातारा) : मोरघर (ता. जावळी) ग्रामपंचायतीच्या उपसरपंचपदी श्रीमती आशालता नारायण गायकवाड यांची बिनविरोध निवड झाली. जावळीच्या राजकारणात केंद्रस्थानी असणाऱ्या मोरघर ग्रामपंचायतीच्या निवडणुकीत सुरेश गायकवाड, भानुदास गायकवाड यांच्या नेतृत्वाखाली पॅनेलने विजय मिळविला होता. त्यावेळी वॉर्डप्रमाणे सदस्यांना संधी देण्याचे ठरल्याप्रमाणे उपसरपंच कृष्णात हिरवे यांनी राजीनामा दिल्याने पद रिक्त झाले होते. (satara-marathi-news-ashalata-gaikwad-vice-president-saygoan)

या पदाच्या निवडीसाठी सरपंच रंजना मोरे, निवडणूक निर्णय अधिकारी शोभा सोनावणे, ग्रामसेवक सतीश गायकवाड, तलाठी बी. एन. आंबवणे यांच्या उपस्थितीत झालेल्या बैठकीत उपसरपंचपदासाठी श्रीमती गायकवाड यांचा एकच अर्ज आल्याने निवडणूक निर्णय अधिकारी सोनावणे यांनी त्यांची उपसरपंचपदी बिनविरोध निवड जाहीर केली. याप्रसंगी सुरेश गायकवाड यांच्यासह ग्रामपंचायत सदस्य बजरंग गायकवाड, सुनीता पालवे, शशिकांत गायकवाड, कृष्णात हिरवे, सुलाबाई डोईफोडे, अर्चना डोईफोडे यांची प्रमुख उपस्थिती होती. निवडीनंतर ग्रामस्थांच्या वतीने सरपंच मोरे यांनी गायकवाड यांचे स्वागत केले.

निवडीनंतर गायकवाड म्हणाल्या, ‘‘माझ्यावर विश्वास ठेवून मला संधी दिली आहे. त्याप्रमाणे गावाच्या सर्वांगीण विकासासाठी सर्व सदस्यांना बरोबर घेऊन प्रयत्न करेन. प्रलंबित विकासकामे पूर्ण करेन.’’ उपसरपंच गायकवाड यांचे आमदार शिवेंद्रसिंहराजे भोसले, जिल्हा परिषदेच्या माजी सदस्या शारदा धनावडे, सभापती जयश्री गिरी, उपसभापती सौरभ शिंदे, सहायक पोलिस निरीक्षक अमोल माने, अमर गायकवाड, न्यायाधीश देवेंद्र गायकवाड, सुनील धनावडे, शशिकांत गायकवाड, दत्तात्रय गायकवाड, नीलेश गायकवाड, धनाजी गोरे, मारुती धनावडे, पपू जेधे, सुभाष पालवे, पोलिस पाटील सुहास भोसले, विकास गायकवाड, संतोष पालवे, मनोहर पालवे यांच्यासह ग्रामस्थ, महिलांनी अभिनंदन केले. दत्ता गायकवाड यांनी सूत्रसंचालन केले. विनोद गायकवाड यांनी आभार मानले.