बॉंबच्या साहाय्याने रानडुकराची शिकार; कोल्हापुरातील तिघांसह पाच जणांवर पाटणात गुन्हा

ढेबेवाडी (जि. सातारा) : बॉंबच्या साहाय्याने रानडुकराची शिकार केल्याप्रकरणी वन विभागाच्या पथकाने कोल्हापूर जिल्ह्यातील तिघांसह पाच जणांवर गुन्हा दाखल केला. वाल्मीक पठारावरील रुवलेच्या (ता. पाटण) हद्दीत वन्यजीव विभागाच्या तपासणी नाक्‍याजवळ काल (ता. 29) रात्री हा प्रकार घडला. गुन्हा दाखल झालेल्यात "वन्यजीव'च्या दोन हंगामी वनमजुरांचा समावेश आहे. 

वन अधिकारी व कर्मचाऱ्यांच्या गस्त पथकाने काल रात्री सणबूर- रुवले रस्त्यावरील पाटीलवाडी फाट्यावर तपासणी केलेल्या कारच्या डिकीत ठेवलेल्या प्लॅस्टिकच्या गोणीमध्ये रानडुकराचे मांस मिळाले. कारमधील राजाराम गंगाराम गिजे (वय 39) व गणेश सोमा परबते (वय 40, दोघेही रा. नवे पारगाव, ता. हातकणंगले) यांना ताब्यात घेऊन चौकशी केल्यावर शिकारीचा प्रकार समोर आला. मारुती निवृत्ती पवार (रा. नवे पारगाव), तुकाराम ज्ञानू साळुंखे (रा. कारळे) या दोघांनाही ताब्यात घेतले, तर त्यांचा आणखी एक साथीदार पसार झाला. या तिघांचाही शिकारीमध्ये सहभाग होता. 

लॉकडाउनच्या भरपाईसाठी आमदार-खासदारांच्या निधीचाही सरकारने वापर करावा : पृथ्वीराज चव्हाण

रुवलेच्या हद्दीत वन्यजीव विभागाच्या चेक नाक्‍याजवळील मालकी क्षेत्रातील माती बंधाऱ्यालगत बॉंब ठेऊन शिकार करण्यात आली. त्यासाठी त्यांनी तीन बॉंब तयार करून आणलेले होते. त्यातील एक बॉंब डुकराच्या तोंडात फुटला, तर उर्वरित दोन बॉंब वन विभागाच्या पथकाने जप्त केले आहेत. सहायक वन संरक्षक किरण कांबळे यांच्या मार्गदर्शनाखाली वन क्षेत्रपाल विलास काळे, वनपाल सुभाष राऊत, डी. डी. बोडके, वनरक्षक अमृत पन्हाळे, जयवंत बेंद्रे व वन मजुरांनी कारवाईत भाग घेतला. 

हरना मना है... आप पुलिस है। मुंबईच्या माजी पोलिस आयुक्तांवर कलामांची कौतुकाची थाप

"वन्यजीव'कडून "त्या' वनमजुरांना घरचा रस्ता
 
रानडुकराच्या शिकार प्रकरणाची "वन्यजीव'ने गंभीर दखल घेतली आहे. या प्रकरणी वन्यजीवच्या दोन हंगामी वनमजुरांवर गुन्हा दाखल झाल्याने संबंधितांना तातडीने कामावरून कमी केल्याचे सूत्रांनी सांगितले. संबंधित दोघेही हंगामी वनमजूर म्हणून काम करत होते. गुन्ह्यातील त्यांच्या सहभागाविषयी माहिती मिळताच तत्काळ कारवाई केल्याचे सांगण्यात आले. वाल्मीक पठारावर वन्यजीव विभागाचे दोन चेक नाके कार्यरत आहेत. 

संपादन : बाळकृष्ण मधाळे