कऱ्हाड (जि. सातारा) : शासनाकडून फळबागेकडे वळा असे सांगितले आहे. त्यातून शेतकरी पपईसारखी फळे घेऊ लागला आहे. मात्र, बाजारपेठेत पपईची आवक वाढल्याने पपईला चार ते पाच रुपये दर किलोला मिळत आहे. त्यामुळे उत्पादन खर्चही निघत नसल्याने पपई उत्पादक शेतकरी अक्षरशः रडकुंडीला आला आहे. अनेक शेतकऱ्यांनी पपई नाशवंत असली, तरीही दर मिळत नसल्याने आणि पपईच्या तोड्याचाही खर्च निघत नसल्याने दोन आठवड्यांपासून पपईचा तोडाच केलेला नाही. त्यामुळे त्या शेतात तशाच पडून आहेत.
सातारा जिल्ह्यातील शेतकरी प्रामुख्याने उसाची शेती करतात. मात्र, उसाचे पैसे शेतकऱ्यांना वर्षा-दीड वर्षांनी मिळतात. त्यादरम्यानच्या काळात शेतातील काही भागांत शेतकरी कमी कालावधीत उत्पादन मिळेल अशी भाजीपाला, फळभाज्यासह फळांची शेती करू लागले आहेत. त्यामुळे शेतकऱ्यांना चार पैसे मिळू लागले आहेत. शासनाकडून शेतकऱ्यांना फळबागेकडे वळा, असे सांगितले जात आहे. त्यातून जिल्ह्यातील अनेक शेतकऱ्यांनी पपईचे उत्पादन घेतले आहे. त्यातून अनेक शेतकऱ्यांना चांगले पैसेही मिळाले.
मात्र, अलीकडे शेतकऱ्यांनी काबाडकष्टाने घेतलेल्या पपईची बाजारपेठेत आवक वाढली आहे. त्याचबरोबर इतर राज्यांतून पपईला मागणी नसल्याने उठाव नसल्याचे सांगितले जात आहे. त्यामुळे पपईला मिळणारे सात ते 12 रुपये किलोचा दर सध्या चार ते पाच रुपयांवर आला आहे. परिणामी, पिकासाठी घातलेला उत्पादन खर्चही निघत नसल्याने शेतकरी हवालदिल झाले आहेत. अनेक शेतकऱ्यांना बॅंका, पतसंस्था आणि सोसायट्यांची कर्ज काढून पपई केली आहे. त्यातच सध्या दर नसल्याने बळीराजासमोर कर्ज कसे भागवायचे हा मोठा प्रश्न आहे. पपई नाशवंत असल्याने पपई जास्त काळ शेतात राहिली, तर ती वाया जाणार आहे. असे असले तरीही पपई तोड्याचाही खर्च सध्याच्या दरातून निघत नसल्याने शेतकऱ्यांनी पपईचा तोडाच दोन आठवड्यांपासून केला नाही.
शासन सांगतंय फळबागेकडे वळा. त्याप्रमाणे शेतकरी फळबागेकडे वळल्यावर त्याच्या दराची जबाबदारी शासनाने घ्यायला पाहिजे. सध्या पपईला दरच नाही. त्यामुळे उत्पादन खर्च आणि तोड्याचाही खर्च निघत नसल्याने आम्ही दोन आठवडे पपईचा तोडाच केला नाही.''
-जयवंत पाटील, शेतकरी
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.