कऱ्हाड (जि. सातारा) : आमदार निधीतून कऱ्हाडसाठी देण्यात येणाऱ्या रुग्णवाहिकेचे नक्की काय झाले, त्याचा सविस्तर अहवाल त्वरित द्यावा, रुग्णवाहिका नको असल्यास पालिकेने तसा ठराव द्यावा, तो निधी अन्य कारणासाठी वळवता येईल, अशा कडक शब्दांत माजी मुख्यमंत्री, आमदार पृथ्वीराज चव्हाण यांनी आजच्या आढावा बैठकीत पालिका अधिकाऱ्यांना सुनावले.
आमदार चव्हाण यांच्या निधीतून कऱ्हाड व मलकापूर पालिकांना दोन वेगवेगळ्या रुग्णवाहिका देण्यात आल्या आहेत. त्यात मलकापूरला रुग्णवाहिका आली. मात्र, सहा महिने झाले तरीही कऱ्हाडची रुग्णवाहिका आलेली नाही. त्यावरून आमदार चव्हाण यांनी थेट अधिकाऱ्यांनाच धारेवर धरले. कोविडच्या पहिल्या लाटेच्या पार्श्वभूमीवर कऱ्हाड शहरासाठी पृथ्वीराज चव्हाण यांनी पालिकेला रुग्णवाहिकेसाठी निधी उपलब्ध करून दिला. कोरोनाची दुसरी लाट आली, तरीही पालिकेत रुग्णवाहिका आलेली नाही. ते लक्षात येताच आमदार चव्हाण यांनी बैठकीत अधिकाऱ्यांना जाब विचारला. काहीशा संतापलेल्या व अत्यंत कडक भाषेत अधिकाऱ्यांना त्यांनी सुनावले. शासनाच्या दिरंगाईने रुग्णवाहिका शहरवासीयांसाठी आली नसेल, तर तसा खुलासा पालिका अधिकाऱ्यांनी त्वरित करण्याचे आदेश आमदार चव्हाण यांनी दिले.
रुग्णवाहिका का आली नाही, याची चौकशी करण्याचे आदेश दिले आहेत, असे आमदार चव्हाण यांनी पत्रकारांनाही सांगितले. श्री. चव्हाण म्हणाले, "कऱ्हाड व मलकापूर शहरांसाठी प्रत्येकी एक रुग्णवाहिका मंजूर होती. त्यानुसार मलकापूरची रुग्णवाहिका आली. मात्र, कऱ्हाडची रुग्णवाहिका आलेली नाही. शहरातील नागरिकांची सेवा करण्यासाठी रुग्णवाहिका दिली होती. ती पालिकेने ताब्यात घेतलेली नाही, त्याचे कोडे आहे. याबाबतचा अहवाल मागितला आहे.''
कऱ्हाड पालिकेला रुग्णवाहिका नको असेल, तर त्यांनी तसा ठराव करून द्यावा. तो निधी शहरातील अन्य कामासाठी वळवता येईल. रुग्णवाहिका न वापरण्याबाबत कोणाचा दबाव असेल, तर तसेही त्यांनी स्पष्ट करावे.
- पृथ्वीराज चव्हाण, माजी मुख्यमंत्री
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.