नागपूजेतून दिला कोरोनापासून स्वसंरक्षणाचा दिला अनोखा संदेश

गोंदवले (जि. सातारा) : सामाजिक बांधिलकी जोपासत नागपंचमीदिवशी नागोबाच्या प्रतीकात्मक मूर्तीला मास्क बांधून नरवणे (ता. माण) येथील काशीद कुटुंबीयांनी कोरोनापासून स्वसंरक्षणाचा संदेश दिला. तालुक्‍यात कोरोना बाधितांची संख्या वाढत असल्याच्या पार्श्वभूमीवर या उपक्रमाचे सर्वत्र कौतुक होत आहे. 

नागपंचमीदिवशी नाभिक समाजाकडून प्रतीकात्मक नागमूर्ती बनविण्याची परंपरा आहे. साधारणतः दोन ते अडीच फूट उंचीची फणा काढून उभा असलेल्या नागाची मातीची मूर्ती बनवली जाते. त्यावर हरभरा डाळ, करडई, गुंज, तसेच गव्हाची खपलीचा वापर करून सजावट केली जाते. नरवणे (ता. माण) येथील हणमंत काशीद यांनी देखील गेली 46 वर्षे ही परंपरा अखंडितपणे सुरू ठेवली आहे. यंदा मात्र या सणावर देखील कोरोनाचे सावट पडल्याचे पाहायला मिळत आहे. गेल्या काही दिवसांपासून माण तालुक्‍यात कोरोनाबधित रुग्णसंख्या झपाट्याने वाढत असल्याने चिंता व्यक्त होत आहे. या पार्श्वभूमीवर नागमूर्तीच्या माध्यमातून लोकांना प्रबोधन करण्याचा प्रयत्न श्री. काशीद यांनी केला आहे. 

दर वर्षीप्रमाणे यंदाही नागमूर्ती बनवली असली, तरी त्यामध्ये मूर्तीच्या तोंडावर मास्क बांधण्यात आला आहे. येथील श्री सर्वेश्वर मंदिरात ही मूर्ती शनिवारी (ता. 25) सकाळी स्थानापन्न करण्यात आली आहे. गावकऱ्यांनी मास्कचा वापर करून कोरोनापासून स्वसंरक्षण करावे, हाच संदेश देण्याचा प्रयत्न करण्यात आला आहे. या मूर्तीची रविवारी (ता. 26) ग्रामप्रदक्षिणा काढण्यात येईल. 

कोरोनापासून बचावासाठी सर्वांनी शासनाच्या नियमांचे पालन करावे, यासाठी नागोबा मूर्तीच्या माध्यमातून संदेश देण्याचा प्रयत्न केला आहे. त्यातून देशहिताला हातभार लागल्याचे समाधान मिळत आहे. 

- हणमंत काशीद, नाग मूर्तिकार, नरवणे 
 

(संपादन ः संजय साळुंखे)

या दाेन गावांतील महिला यंदा एकमेकांना शिव्या देणार नाहीत