सातारा : झेडपी’, पंचायत समितीतील २८१ जणांना कोरोनाची बाधा

सातारा - गेल्या महिनाभरात जिल्हा परिषद, (ZP) पंचायत समितीचे (Panchyat Committee) अधिकारी, कर्मचारी मिळून २८१ जण कोरोना पॉझिटिव्ह (Corona Positive) आले आहेत. त्यामधील आतापर्यंत ४५ जणांना डिस्चार्ज देण्यात आला असून, २३६ कर्मचारी उपचार घेत आहेत.

पहिल्या आणि दुसऱ्या लाटेत सातारा जिल्हा परिषदेचे पदाधिकारी, अधिकारी, कर्मचारी हे मोठ्या संख्येने बाधित आले होते. विविध विभागांच्या ३० कर्मचाऱ्यांना मृत्यूचा सामना करावा लागला होता. तिसऱ्या लाटेत गेल्या सव्वा महिन्यात मोठ्या प्रमाणात बाधित वाढले आहेत. १५ डिसेंबर ते २५ जानेवारी या कालावधीत कऱ्हाड पंचायत समितीमधील ३६, कोरेगाव- १४, खटाव- १६, खंडाळा- २७, जावळी- ४, पाटण- ३९, फलटण- ३७, महाबळेश्वर- १२, माण- २१, वाई- ५० व सातारा पंचायत समितीचे २५ असे २८१ कोरोना पॉझिटिव्ह आढळून आले आहेत.

जिल्हा परिषद, पंचायत समिती कार्यालयांत अनेक निर्बंध घालण्यात आले आहेत. जिल्हा परिषदेत अभ्यंगताना प्रवेश बंदी घालण्यात आली आहे. प्रशासन आवश्यक त्या उपाययोजना करत असून, नागरिकांनी सूचनांचे पालन करण्याचे आवाहन, उपमुख्य कार्यकारी अधिकारी मनोज जाधव यांनी केले आहे.

बाधितांची संख्या घटली

जिल्ह्यात गेल्या दोन दिवसांत बाधितांची संख्या कमी होताना दिसत आहे. गेल्या २४ तासांत जिल्ह्यात आणखी ९२१ कोरोनाबाधित आढळले असून, सात जणांचा उपचारादरम्यान मृत्यू झाला आहे. जिल्ह्यात बाधित रुग्णांचा संक्रमण दर २४ टक्के आहे.