आदित्य ठाकरेंच्या सभेनंतर शंभूराज देसाईंचं रविवारी शक्तिप्रदर्शन; सभेकडं जिल्ह्याचं लक्ष

कऱ्हाड : कॅबिनेट मंत्रिपद मिळाल्यानंतर ‌शंभूराज देसाई (Shambhuraj Desai) रविवारी (ता. १४) प्रथमच मतदारसंघात येणार आहेत. त्यामुळे त्यांच्या स्वागतासाठी कार्यकर्त्यांनी जोरदार तयार केली आहे. युवा सेनेचे आदित्य ठाकरे (Aditya Thackeray) यांची मल्हारपेठ येथे जाहीर सभा झाली होती. त्यांच्यानंतर मंत्री देसाई यांची जाहीर सभा होणार आहे. त्यामुळे त्यांच्या शक्ती प्रदर्शनाकडे जिल्ह्याचे लक्ष लागले आहे.

पाटण विधानसभा मतदारसंघात (Patan Assembly Constituency) मंत्री देसाई यांचे कऱ्हाड तालुक्यातील वारुंजी फाटा येथून लोकनेते बाळासाहेब देसाई साखर कारखान्यापर्यंत (Balasaheb Desai Sugar Factory) ठिकठिकाणी स्वागत करण्यात येणार आहे. त्यानिमित्ताने गाड्यांची रॅलीही होणार आहे. त्यानंतर दौलतनगरला जाहीर सभा होणार आहे. त्यानुसार प्रत्येक जिल्हा परिषद गणात नियोजनासाठी बैठकीचे कार्यकर्त्यांनी आयोजन केले‌ आहे. विजयनगर सुपने ते मरळी कारखाना या दरम्यान प्रत्येक गावात मंत्री देसाई यांचे स्वागत करण्यात येणार आहे.

मंत्रिपद मिळाल्यानंतर पहिल्यांदाच देसाई येत असल्याने कार्यकर्त्यांत उत्साह आहे. तालुक्यात स्वागताचे बॅनर्स तयार करण्याच्याही हालचाली सुरू झालेल्या आहेत. कारखाना कार्यस्थळावर जाहीर सभेचे नियोजन करण्यात आले आहे. देसाई यांना कॅबिनेट मंत्रिपद मिळाल्याने पाटण तालुक्यात नवचैतन्य निर्माण झाले आहे. आदित्य ठाकरे यांची मल्हारपेठ येथे जाहीर सभा झाली होती. या पार्श्वभूमीवर शिंदे गटात बंडखोरी केल्यानंतर प्रथमच मंत्री झालेल्या देसाई यांची‌ जाहीर सभा होणार असून, ते काय बोलणार याकडे पाटण तालुक्याचे लक्ष लागून राहिले आहे.