साताऱ्यातील चौकाचौकांत नाकाबंदी; विनाकारण फिरणाऱ्यांवर कडक कारवाई

सातारा : लॉकडाउन असतानाही कोणत्याही सबळ कारणाशिवाय शहरात फिरणाऱ्यांची धरपकड करण्यासाठी सातारा शहर, शाहूपुरी आणि सातारा शहर वाहतुक शाखेने शहरातील विविध चौकांची नाकाबंदी करत कारवाईचे सत्र आरंभले होते. दिवसभरात अनेक दुचाकी, चारचाकी धारकांवर दंडात्मक कारवाई करण्यात आली असून येत्या काही दिवसांत वाहने जप्तीची मोहिम हाती घेण्यात येणार आहे.

कोरोनाचा प्रसार रोखण्यासाठी पुकारलेल्या लॉकडाउनमधून अत्यावश्‍यक सेवा वगळण्यात आलेल्या आहेत. या अत्यावश्‍यक सेवांच्या नावाखाली अनेक सातारकर राजरोस शहराच्या विविध भागात दुचाक्‍या, चारचाक्‍या घेवून फिरत आहेत. या साताकरांना अडवत पोलिस कर्मचारी चौकशी करत असतात. चौकशीत अगदी शुल्लक कारणासाठी संबंधित वाहनचालक घराबाहेर पडल्याचे लक्षात आल्यानंतर त्याच्यावर दंडात्मक कारवाई करण्यात येते.

एकंबेत डबल सेंच्युरी; घरोघरी बाधित सापडल्याने गाव बनले 'हॉटस्पॉट'

आज सकाळी पोलिसांनी मोती चौक, देवी चौक, कमानी हौद, शाहु चौक, पोवईनाका, शेटे चौक, जुना मोटार स्टॅंड चौकातील रस्ते बॅरिकेट लावून बंद करत येणाऱ्याजाणाऱ्याची चौकशी सुरु केली. चौकशीदरम्यान उडवाउडवीची उत्तरे देणाऱ्यांवर कारवाईचे सत्र यानंतर पोलिसांनी आरंभले. दिवसभर हे सत्र सुरुच होते. मुख्य रस्त्यावर कारवाई होत असल्याने सातारकरांनी गल्लीबोळातील रस्त्यांचा आधार घेतला. यामुळे अनेक ठिकाणच्या अरुंद रस्त्यांवर वाहतुकीची कोंडी झाली होती. येत्या काही दिवसांत वाहने जप्तीची मोहिम हाती घेण्यात येणार असल्याची माहिती वाहतुक शाखेच्या कर्मचाऱ्यांनी दिली.

Edited By : Balkrishna Madhale