स्मशानभूमीत अघोरी पूजा; पुण्याच्या सहा जणांना भुईंज पोलिसांकडून अटक

भुईंज (सातारा) : सुरूर (ता. वाई) येथील स्मशानभूमीत अल्पवयीन मुलीवर अंधश्रद्धेतून अघोरी पूजा करणाऱ्या सहा जणांना भुईंज पोलिसांनी (Bhuinj Police) हडपसर (पुणे) (Hadapsar Pune) येथून अटक केलीय. राहुल राजेंद्र भोसले, नितीन लक्ष्मण चांदणे, विशाल बाबासाहेब चोळसे, सुमन बाळासाहेब चोळसे, सुशीला नितीन चोळसे, केसर लक्ष्मण चांदणे (सर्व रा. बाबासाहेब आंबेडकर कमानीसमोर रामटेकडी, हडपसर, पुणे) अशी अटक केलेल्यांची नावे आहेत. याबाबतचा अधिक तपास भुईंज पोलीस करत आहेत.

याबाबत भुईंज पोलिसांकडून मिळालेली माहिती अशी, रविवारी हडपसर (पुणे) येथून आलेल्या तीन महिला व तीन पुरुष दुपारी बारा ते साडेचार वाजण्याच्या दरम्यान सुरूर येथील स्मशानभूमीत हळदी, कुंकूचे गोलाकार रिंग करून त्यावर अल्पवयीन मुलीच्या मांडीवर जिवंत कोंबडा ठेवून मृतदेह जाळण्याच्या ठिकाणी अग्नी पेटवून अघोरी विद्येचा प्रयोग करीत होते. ती सर्व परिस्थिती पाहता हा नरबळीचा प्रकार आहे की काय, अशी शंका तेथील जागरूक नागरिक व युवकांना आल्याने त्यांनी त्यांचा व्हिडिओ काढून सोशल मीडियावर व्हायरल केला. त्यानंतर त्यांना जाब विचारण्यासाठी गेले असता, त्यांनी उडवाउडवीची उत्तरे देऊन तेथून पलायन केले होते. या प्रकाराबद्दल भुईंज पोलीस ठाण्यात तक्रारही दाखल करण्यात आली होती. तद्नंतर आज पोलिसांनी त्यांना अटक केली असून कारवाईचे काम सुरु आहे.